Program polis komuniti diatur IPD Padawan mujur

KUCHING: Indu Opis Polis Pelilih (IPD) Padawan begulai enggau Masjid AlAbyad sereta Gerempung Polis Komuniti Matang ngatur program polis komuniti ke dikumbai ‘Polis dan Masyarakat Berpisah Tiada’ kena Hari Lima tu tadi.

Tuju program nya diatur dikena meri penyedar bekaul enggau pengawa nagang penyalah.

Nengah program nya pesereta tauka mensia mayuh diberi penyedar ngambika ulih ngetaika penerang pasal penyalah ke nyadi ngagai piak polis sekalika ngena telefon tauka terus datai betemu enggau polis.

Nambahka nya juluk program nya mega dikena ngerapit enggau nempa kaul rat enggau raban bansa nengah program kerejasama.

Entara atur ke dipejalaika dalam program nya ti diatur ba Masjid Al-Abyad, baka licha bekaul enggau Pengawa Nagang Penyalah ari ASP Abd Wadi Abdl Rani, ke nyadi KBPJKKD Padawan.

Lalu Ketuai Polis Pelilih Menua (KPD) Padawan, Supt Aidil Bolhassan nerang sereta nyimpul juluk program nya.

Nyerumba program nya, tabung khas mujur dipenyadi ungkup aktiviti Persatuan Kepolisan Khidmat Masyarakat Kuching, kelimpah ari pengawa pemandang ari piak polis.

Sama bisi datai ba program nya, 17 Pegawai Kanan polis enggau 96 Pegawai Rendah Polis; Chairman Masjid AlAbyad Ustaz Mat Akhir Ahmad sereta sapit chairman iya Mohammad Hop; Chairman Persatuan Kepolisan Khidmat Masyarakat Kuching mohd Alhafiz Hamdan sereta urung lebih 300 iku orang ti besembiang ba masjid nya.