Penyedar mensia mayuh bekaul penyakit rabies majak manah
KUCHING: Tikas penyedar mensia mayuh ba nengeri tu bekaul enggau penyakit rabies tauka penyakit ukui gila, majak manah.
Direktor, Opis Servis Veterinar Sarawak (JPVS), Dr Adrian Susin madahka, penyedar mensia mayuh bekaul penyakit nya ulih diperatika ba sambut program sereta kimpin ti dipejalaika dikena nagang penyakit nya majak ngerekai.
JPVS kenyau ari kes rabies nyadi ba nengeri tu, udah ngatur 1,757 kimpin penyedar rabies ti dipasuk 53,279 iku penyereta.
“Tikas penyedar raban bansa naka ke diatu, aku melabaka mensia mayuh udah nemu tauka sedar pasal penusah ke ulih nyadi ari penyakit rabies tu.
“Lalu raban bansa mega nemu pemesai guna meri tuchuk vaksin anti rabies ngagai ukui, laban aku meda tiap kali program nuchuk vaksin tu, sambut endang chukup meri peransang.
“Program penyedar pasal rabies dipejalaika kenyai ari taun nyin kemari, nengah macham chara baka media massa, randau, program belanda sereta kebukai, lalu program ti baka tu deka dipajakka ba taun tu,” ku iya.
Dr Adrian mansutka penerang nya lebuh dikerandau pengarang berita ba program nuchuk vaksin anti rabies ke diatur JPVS ba Dewan Masyarakat Kuching ditu, kemari.
“Kitai (JPVS) udah ngatur program nuchuk vaksin anti rabies ngena chara besai lebih ari 100 kali, ti dipejalaika tiap ujung minggu. Naka kemari (ensanus) kitai (JPVS) udah nuchuk 74,298 iku jelu ti nyengkaum 66,079 iku ukui lalu ke lebih nya mayau (8,165 iku enggau 54 iku jelu bukai).
“Sehari tu (kemari) aja, kitai ngatur program nuchuk vaksin anti rabies ba enpat endur iya nya di Sibu, Sarikei, Betong enggau Kuching.
“Kitai mega bisi ngatur program ngagai genturung pen- diau di Serian sereta melabaka nyentuk ujung taun tu semua kandang menua di Serian ulih tembu magang enudr ngatur program tu,” ku iya.
Kemari Dr Adrian madah mujur nuchuk 681 iku ukui ke dianjung betuchuk ngagai program nya ba Dewan Masyarakat Kuching.
Lebuh ke ngenang pasal tuchuk vaksin nya, iya madahka tuchuk nya enda tau enda diberi ngagai ukui dibaruh Seksyen 40 Ordinan Kesihatan Awam Veterinar 1999.
Enti enda ku iya, pengempu ukui deka ditinggang ukum denda nyentuk RM2,500 dibaruh Seksyen 40 Ordianan Kesihatan Awam Veterinar 1999.
Nyema ukui udah dituchuk vaksin nya, patut dikurung dalam kandang rumah dikena nyelamat, nyeliah sereta ngurangka risiko ukui nya ari dirampit rabies, ku Dr Adrian.