Selampur nengeri tu deka ngasai bungkur bekal lektrik 24 jam manggai 2020
KUCHING: Rayat ba selampur nengeri tu deka ngasaika bungkur bekal lektrik 24 jam ba taun 2020 tumu agi dibandingka enggau sadang tumu iya nya lebuh manggai taun 2025.
Menteri Muda Lektrik Menua Pesisir, Dr Abdul Rahman Junaidi ti andal enggau pekara tu madahka naka taun 2018, Sarawak udah tejapaika 91 peratus bungkur bekal lektrik.
Laluh 9 peratus agi iya nya 30,000 ruang bilik ke bedau disambung bekal lektrik ku iya, benung chakah dipejalaika.
“Tebal agi ruang bilik ke bedau nerima bekal lektrik tu dikandang menua pesisir ke jauh kediri.
“Lalu di kandang menua pesisir ti semak enggai kandang pasar, ulih disambung terus nengah grid besai ke dikembuan kitai diatu.
“Ke penerang grid kedua nyau deka tembu magang sereta deka dipenyadika enda lama agi ke ulih mekalka 500 kilowatt sejam (kWh) ari Sematan ke Lawas,” ku iya.
Iya mansutka pekara nya lebuh dikerandau pengarang berita pengudah bejadika Pusat Komuniti Pantai Damai ba Dataran Buntal, Jalan Sultan Tengah ditu kemari.
Dikena nentuka bungkur bekal lektrik ulih disambung ngagai serata nengeri, perintah ku iya udah numbuhka Skim Pembekalan Elektrik Alternatif Luar Bandar ( SARES) ti berengkah ba taun 2016.
Ku iya, kenyau SARES dipejalaika, tebal agi kandang menua pesisir ke jauh udah disambung bekal lektrik ngenan sistem solar.
Enti suba ku iya, sida ngena injin api (perengka penatai karan) ti mar ari segi penyelenggaraan sereta mayuh pengelemi bukai dibandingka enggau SARES ti enda begunaka sida ngeluarka belanja laban dipelanja perintah nengeri nengah Sarawak Energy.
“Kitai ngarapka lebuh grid besai kedua tembu sereta SARES tu, kitai deka ulih nyambung bekal lektrik ngagai serata Sarawak tumu agi ari ke ditagit ba taun 2025,” ku iya.
Ngenang pekara bukai, Dr Rahman ti mega Kaban Kunsil Nengeri (ADUN) Pantai Damai terkilan enggau penerang Menteri Kemajuan Luar Bandar dan Wilayah, Rina Mohd Harun ti menilai baru projek ti udah dikemendarka ba nengeri tu.
Ku Dr rahman, semua projek nya udah dikemendarka di Sarawak nya amat beguna sereta nadai rayat nengeri tu ti enggaika projek nya dipajakka baka ti didawa ulih menteri nya.
“Aku chukup ensiban enggau penerang menteri kitai sereta enti ulih minya iya (Rina) datai ke nengeri tu lebih agi di menua pesisir ti tusah sereta amat begunaka infrastruktur baka jalai alun, jematan enggau ke bukai.
“Sarawak begunaka belanja sereta pengibuh ti lebih dibandingka enggau nengeri bukai ba Malaysia sereta enda adil ngagai perintah nengeri empu nyendiaka belanja laban Sarawak pemadu besai ba sukut meri penatai pemisi ngagai menua,” ku iya.