Penerebai domestik entara mengeri di Sabah, Sarawak enda kena SST

MIRI: Semua penerebai dalam nengeri ( domestik) entara mengari di Sarawak enggau Sabah enda kena Chukai Jual enggau Servis ( SST) ti berengkah bulan September.

Kaban Kunsil Nengeri ( ADUN) Pujut Dr Ting Tiong Choon madah, pekara nya udah nerima jaku setuju ari Menteri Wang Lim Guan Eng.

“Tu semina ungkup Sabah enggau Sarawak lebuh penerebai entara mengeri di kededua nengeri tu enda kena tinggang chukai tu.

“Menteri Wang ( Lim) udah setuju deka nyeliahka SST ungkup penerebai entara mengeri di Sarawak enggau Sabah lebuh ti betemu enggau iya dua minggu ke udah,” ku iya madah dalam aum media ba Indu Opis Parti Demokratik Rayat (DAP) kemari.

Sama bisi datai ba aum media nya Sekretari DAP Sarawak Alan Ling Sie Kiong, ADUN Pelawan David Wong Kee Woan enggau Chairman DAP Senadin Dr Bob Baru.

Taja pia, penerebai domestik entara mengeri keluar enggau masuk ke Sabah, Sarawak sereta Semenanjung Malaysia agi mengkang kena SST.

Beserimbai enggau nya Dr Ting ngambi awak nya mantaika pengaga ati ngagai Kaunsil Mengeri Miri (MBM) laban agi ulih bediri tegut sentang prinsip sida bekaul isu Pasar Malam Saberkas.

“Aku mantaika pengaga ati ngagai Adam Yii (Datuk Bandar Miri) enggau Kaban Kaunsil ti udah ngeringka diri sentang prinsip sida bekaul isu nya.

“Tu pemutus enggau pekara ti betul ke udah digaga MBM laban nyema enda diputar diatu, nya deka nyadi siti penanggul ti besai jemah ila,” ku iya.

Bala orang dagang di Pasar Malam Saberkas deka berengkah nyabut undi dikena nentuka lot dagang sida kena Hari Satu tu (pagila).