Perintah Sarawak merambu nganjung nembiak ari Universiti Curtin, Swinburne nembuka kus di Australia
SIBU: Kepala Menteri Datuk Patinggi Abang Johari Tun Openg madah diatu sida benung berunding enggau Universiti Curtin sereta Universiti Swinburne di Sarawak bekaul nembiak ti nembuka sekeda kus sida ba renggat kepenudi di Australia.
“Aku diatu benung berunding enggau Universiti Curtin sereta Universiti Swinburne di Sarawak lalu pia mega nyangka enggau Universiti Kolej Teknologi Sarawak (UCTS) jemah ila.
“Universiti Curtin enggau Universiti Swinburne bisi kampus di Australia. Nyangka ba sekeda kus (ungkup sida ti nerima skularship Yayasan Sarawak) belajarka pekara pemun di Universiti Swinburne tauka Univerisiti Curtin di Sarawak dalam timpuh dua taun. Lalu ba pelajar renggat kepenudi, kitai nganjung sida ke kampus besai di Melbourne tauka Perth, ke endang palan asal universiti tu,” ku iya madah lebuh bejadika Pengerami Nyuaka Perais Nyulut Yayasan Sarawak Bagi Menua Sibu 2018 kemari.
“Reti nya tu sekeda kus baru ke endang di Sarawak tang nadai ngembuan fasiliti ditu – lalu ba renggat kepenudi, kitai nganjung (sida) ke Perth tauka Melbourne nengah Univerisiti Swinburne enggau Universiti Curtin.
“Ari nya, aku pechaya tu deka mandangka sekeda pekara ke patut ungkup bala anak kitai di nengeri tu, nambah mega, tu kus baru. Nyangka universiti di menua tu bisi kurang mimit sentang orang ti landik sentang pekara seni bina enggau pelajar robotik. Kitai ulih mai sida ke kampus besai ( di Australia),” ku Abang Johari seraya madah iya mega nyangka deka berundingka pekara ti sebaka enggau UCTS sentang pekara tu.
Ku iya nambah, iya sedarka mayuh kus ke bekait enggau teknologi baru diatu. Chunto nya dalam pelajar ICT, nya begunaka ‘programmers’, analisis sistem, sekuriti siber ke entara kus baru ke ngubah dunya ngagai Revolusi Industri 4.0.
Iya madah, UCTS mega bisi nyediaka kus bekaul program teknologi kayu.
Ambika chunto Vietnam ke nyadi siti ari menua ti ngasil enggau eksport perengka dalam rumah ti bepelasarka kayu ti besai di Asia Timur mega udah ngena enggau naka ulih teknologi nanam baru pun kayu.
Tu mega ngadaka mayuh peluang gawa ungkup peranak di menua tu, ku iya nambah.