Projek jalai alternatif nadai mansa Brunei deka terus digaga, ku Baru
LAWAS: Menteri Kereja Raya Baru Bian madah jalai alternatif ari Miri ke Limbang enggau Lawas nengah Long Lama, Marudi, Bario nyentuk ke Limbang enggau Lawas ti nadai mansa Brunei deka terus digaga.
Iya madah, pekara nya udah disetuju Menteri Besai Tun Dr Mahathir Mohamad maya aum taklimat begulai enggau Opis Menteri Kereja Raya (KKR) Malaysia sebedau tu.
“Jalai alternatif ti mansa ‘missing link’ ari Miri ke Limbang enggau Lawas nengah Long Lama, Marudi, Bario lalu terus ke Limbang enggau Lawas ti nadai mansa Brunei deka terus digaga.
“Pengawa ngaga jalai tu dikena mutar penanggul baka ngena pasport, mai barang pemakai baka berau enggau ke bukai ari bala peranak Limbang, Lawas enggau Miri nengah Brunei,” ku iya maya bejadika Projek ‘Lawas My Home’ nyerumba Karnival Belia Lun Bawang ditu ensana.
Bela datai Chairman Nembiak Gerempung Lun Bawang Sarawak (PLBS) Petrus La- song, Chairman Nembiak PLBS Pampang Miri Andrew Labo enggau Chairman Nembiak PLBS Lawas Josely Pengiran.
Kaban Kunsil Nengeri (ADUN) Ba’kelalan enggau Kaban Parlimen Selangau nya madah, Perintah Sarawak patut berati guna enggau ngemanah jalai genturung pendiau ke rumah- rumah panjai enggau peranak ba sitak menua pesisir di nengeri tu.
“Kitai berati nengeri tu udah ngembuan jalai penyambung iya nya jalai Pan Borneo enggau jalai pesisir ti besambungka sitak selatan nyentuk ngagai utara Sarawak.
“Nya alai, beguna amat Perintah Sarawak beratika sukut bukai ke lebih beguna dikena ngemansangka menua pesisir di Sarawak,” ku iya.
Ba pengerami nya, iya mega madah semua piak patut nentuka Lawas ngatika diri ari keruga dadah lebih agi bansa syabu.
Ku iya, piak kaunsil kandang menua ( PBT) patut regas meresi pelilih Lawas ari keruga negatif lebih agi syabu enggau dadah.
“Kitai deka datai baru betemu enggau peranak Lawas seraya berati pengawa piak bekaul mutar penanggyl dadah di Lawas.
“Berebak enggau nya, kitai mega deka semua komuniti bekaul patut nentuka Lawas beresi ari keruga dadah enggau syabu ti dipeda balat ngirau,” ku iya.
Kenu ku iya, nembiak endang reta ke beguna ngagai menua lalu patut diajar sereta diiring dalam mayuh pengelandik setipak enggau penau sida.
“Karnival nembiak tu patut ditampung jemah nyadika pelajar endur ngiga raban nembiak ti ngembuan penau ti patut dikerembai ngagai tikas ke lebih tinggi,” ku iya.
Ba pengerami nya, Baru mega madah geran perintah penyampau RM20,000 ungkup PLBS Pampang Belia Lawas.