Nengah Yayasan Sarawak ejensi ari baruh perintah nengeri udah nyediaka skularship, duit jali dikena nentuka kualiti pelajar
SIBU: Perintah nengeri nengah Yayasan Sarawak udah nanam puku agih belanja dalam numbuhka universiti lalu mega deka meri skularship enggau duit jali ngagai peranak Sarawak enggau nembiak ke bukai ari menua luar ngambika sama dalam siti pelajar global.
Kepala Menteri Datuk Patinggi Abang Johari Tun Openg madah, tu iya nya siti ari puku ke endang chukup besai, taja pan pekara pelajar ari baruh perintah besai.
“Ketegal nya kitai udah numbuhka Universiti Koleh Teknologi Sarawak (UCTS) nengah puku ari Yayasan Sarawak ke mega nengah perintah nengeri. Kelimpah ari nya, kitai mega bisi nanam puku enggau Universiti Curtin sereta Universiti Swinburne di Kuching.
“Nyema kitai nadai agi ngembuan sistem pelajar ba tikas dunya, nya ti ngenakutka kitai ila raban graduet ti pansut semina ‘menang di kelang diri’ aja. Taja pan ari suku pelajar, pemutus sida manah... Tang nya semina dalam kandang standard kitai,” ku iya.
Iya madah munyi nya lebuh ti bejaku bejadika Pengerami Nyuaka Perais Nyulut Yayasan Sarawak Bagi Menua SIbu 2018 di UCTS, kemari.
Abang Johari ke mega Chairman Yayasan SArawak madah nyema perintah nengeri bekerejasama enggau universiti antarabansa ke ngembuan kualiti tinggi, nya ulih nyadi tikas kelai penyulut lalu graduet ti pansut mega bisi kualiti ti tinggi.
“Nangkan ke nya, sida ulih nyambung pelajar ke tikas ‘post-graduet’, ari ‘undergraduet’ ke ‘post graduet’ nyentukka bidang PhD.
“Tu ulih ngemansutka siti gaya pemansik ti manah dalam kitai ti deka meri basa ngagai semua sumber asal ke bisi di nengeri tu,” ku iya.
Nya alai, ku iya nambah, Yayasan Sarawak ukai semina ulih meri duit jali enggau skularship, tang mega nengah pengawa nanam puku di palan pelajar tinggi nya ulih meri awak dalam penyampau ke mayuh ngagai anak Sarawak ngulihka degree sida.
Beserimbai enggau nya, Abang Johari mega bisi madahka ungkup taun 2018 Yayasan Sarawak udah nerima peminta sepenyampau 867 ungkup skularship sereta duit jali.
Ku iya, ari penyampau 451 peminta ungkup nyambung pelajar dalam menua tu udah dikemendar iya nya setegah ari penyampau semua peminta.
“Kelimpah ari nya, ungkup program di menua luar, iya nya mayuh pelajar ba tikas master... Sepenyampau 38 peminta udah dikemendar, lalu ditangkan 187 skularship sereta duit jali ungkup bidang teknikal lalu ke bukai baka Litericha, Seni enggau Sumber Manusia sepenyampau 54 peminta udah dikemendar.
“Reti nya, ari 867 peminta, yayasan Sarawak udah nge- mendar 730 peminta iya nya 84 peratus. Lalu tu peluang ke diberei kitai ngagai bala nembiak di nengeri tu,” ku iya madah.
Dulu agi ari nya, dalam jaku pengelalu Direktor Yayasan Sarawak Azmi Bujang madah, bisi 20 buah sekula sekondari di bagi menua Sibu nerima Setipikit Nembiak Nyulut Yayasan Sarawak ke sama mega bulih Setipikit SImpanan Premium Bank SImpanan Nasional (BSN).
Ku iya, nembiak deka nerima SSP BSN sepenyampau RM500 ungkup nembiak Sijil Pelajaran Malaysia (SPM) lalu RM700 ungkup Sijil TInggi Persekolahan Malaysia (STPM).
“Penyampau penerima semua nyasaritu ari bagi menua Sibu iya nya bisi 240 iku ari 20 buah sekula. Ari penyampau nya, bisi 214 nembiak SPM lalu 26 iku nembiak STPM,” ku iya nerang.
Iya mega madahka bisi 1,432 iku penerima di selampur Sarawak taun nyin kemari.
Ba pengerami ti sebaka Yayasan Sarawak mega meri geran ngagai Gerempung Apai indai enggau Pengajar (PIBG) ngagai empat buah sekula di bagi menua Sibu.
Sekula nya Sekula Primari (SK) Rantau Panjang SIbu, SK Tanjung Penasu Sibu, SK Ulu Majau Kanowit enggau SK St Mark Selangau, ke alai semua sekula tu udah nerima geran sepenyampau RM10,000.
Sama bisi datai ba pengerami nya Menteri Wang Kedua ti mega Menteri Dagang enggau E-Dagang Dato Sri WOng Soon Koh, Menteri Muda Pelajar enggau Pemansik Teknologi Dr Annuar Rapa’ee, Mandal Canselor Professor Datuk Dr Khairuddin Abdul Hamid sereta bala ke bukai.
Ketegal nya kitai udah numbuhka Universiti Koleh Teknologi Sarawak (UCTS) nengah puku ari Yayasan Sarawak ke mega nengah perintah nengeri. Kelimpah ari nya, kitai mega bisi nanam puku enggau Universiti Curtin sereta Universiti Swinburne di Kuching. Datuk Patinggi Abang Johari Tun Openg Kepala Menteri