Sekula repuk, pemansang menua pesisir patut difokus perintah PH
SARIKEI: Perengka guna sekula, lebih agi bekaul enggau sekula repuk enggau pemansang menua pesisir endang patut nyadi fokus Perintah Besai ke diiring Pakatan Harapan (PH).
Menteri Muda Perambu Mengeri, Pengatur Tanah enggau Rampa Menua, Datu Len Talif Salleh madah, dikena ngamatka juluk tu perintah besai enggau perintah nengeri patut bekerejasama ba pekara tu.
“Enti kitai berati ba nengeri tu, agi mayuh sekula repuk ba sitak menua pesisir ti begunaka perati enggau atur lengkas dalam ngemanah sekula ari sukut perengka guna awakka sebaka enggau sekula ba kandang mengeri.
“Isu baka tu enda patut dibalut enggau politik laban sekula endang pelasar ke pemadu manah, lantang sereta ngembuan perengka moden ke ulih dikena nempa raban nembiak rebak baru ti bekualiti.
“Nya alai, kitai ngarap perintah besai enggau perintah nengeri bela besaup ngemanah perengka guna sekula ba Sarawak,” ku iya.
Len madah munyi nya rambau bejadika begunan Sistem Pemansang Industri (IBS) Sekula Primaro (SK) St Andrew Sare ditu kemari.
Projek sekula IBS tu beungkus RM2.3juta lalu udah mujur dikemansangka exKaban Parlimen Tanjung Manis, Datuk Norah Tun Abdul Rahman.
Begunan baru ke digaga dalam timpuh empat bulan ukai semina bisi enam bilik kelas tang mega disikap enggau perengka elektrik, bilik kelas, jemari enggau ke bukai.
Kenu ku Len, perintah nengeri chukup chakah ngemansangka perengka guna pelajar laban deka meda mayuh agi raban nembiak pandai, kreatif, inovatif enggau ngembuan runding kelas satu.
“Penyebela sekula menua pesisir enggau kandang mengeri patut diberi fokus lengkas, laban kitai enggai meda raban nembiak ba kandang menua pesisir terus tinggal.
“Dikena ngemujurka juluk tu, kerejasama semua piak beguna amat lalu ukai semina ngandal siti piak aja ngereja pengawa,” ku tandu Len.
Ba pengerami nya, Len ke mega Kaban Kunsil Nengeri (ADUN) N.41 Kuala Rajang bisi nyuaka agih bantu RM2,500 dikena sida ngatur pengerami.
Bela datai iya nya Residen Sarikei, Mohamad Junaidi Mohidin, Pemantu Pemesai Opis Pelajar Sarikei, Faustino Frederick Empran, Menijar Projek Opis Kereja Raya Sibu, David Wong Bak Soon, Pengurus Erakristal Sdn Bhd, Mohd Amin Adenan enggau Kepala Pengajar SK St Andrew, Angkau Raieng.