Manju siku agi Bujang Berani balat dikenangi komunis maya menua siga
JULAU: Pemedis ati meda enda dikemendar munuh komunis nejuka seraban soldadu unit 1st Renjer tauka sebedau nya dikelala enggau nama Sarawak Renjer ngujungka raban komunis ngelarika diri.
Jaku kelanjur nya semina deka nyadika ‘lisin’ ngagai raban sida ngambika ulih nimbak komunis ketegal atur udah ditetapka komunis enda diasuh dibunuh enti nadai mai senyata tauka enda ngelaban.
Pengingat ke nyadi taun 70-an di Muara Tebas tu mengkang dikenang asaika baru nyadi kemari ba Lans Koperal Manju Anak Geruna, 73, iya ke diatu enda pengerai ketegal udah kena strok kenyau ari taun siti ke udah.
Bekunsi cherita betempuh enggau munsuh, ari penyarut ke nyadi di Brunei udah nya ditangkan Konfrentasi Indonesia lalu kepenudi je- man komunis, iya semampai ngingat genap iti pekara nyadi sepemanjai tiga bengkah tibak sejarah menua Malaysia nya.
Maya operasyen nangkap komunis ba Muara Tebas alai Manju maya nya nyadi ‘Platun Signal’ baka bakih bukai gagit bendar deka munuh munsuh.
“Komunis ke ditangkap kami maya nya enda ngelaban...nadai mai senapang.
“Iya maya nya dipelabaka semina nganjung pemakai ngagai raban komunis dalam kampung.
“Kami ngasuh iya lari tang iya enggai. Nyema iya ngelarika diri kami ulih nimbak iya,” pia ku iya maya nusi sekeda ari pengingat iya sekumbang ke nyadi soldadu sebedau ngemaduka diri bulan Oktober 1973 ngagai pengarang, empai lama.
Sejarah ngemunaska komunis di Muara Tebas nyadi maya Operasyen Hentam tauka Ops Hentam alai maya nya unit 1st Renjer betuaika Lt. M Baharin Abd Jalil mujur munuh 13 iku komunis kelimpah sekeda ti balat bakal.
Ke bukai iya ke mujur ngelarika diri endang disidi raban platun nyentuk ulih ditangkap.
Kelimpah nangkap komunis di Muara Tebas, platun sida Manju mega nangkap mayuh komunis ba endur bukai baka di Kelupu (Bintangor) enggau sebelah Sarikei.
Ku iya, sebedau nya kem sida di Kelupu diserang munsuh tang baik maya nya raban sida nadai siku bakal.
“Nangkan di Kelupu, maya kami nyidi komunis di Peradom Sibu, bendar bala betimbak enggau komunis nyau besehari-sari.
“Udah nya kami diasuh ngipa komunis ba kem tang komunis enda nengah jalai nya,” ku iya madah.
Iya madah, sekumbang ke nyadi soldadu, iya enggau bala bukai semampai betempuh enggau munsuh lalu sida ke ditangkap tang enda ngelaban enda dibunuh laban nitihka atur.
Agi ngerintaika kenang, sebedau belaban enggau munsuh komunis, iya enggau bala bukai endang ngetanka pengelikun menua betempuh enggau munsuh ke digelar ‘Sri Wangi’ (soldadu Indonesia) maya Konfrentasi Indonesia ba garis entara menua.
“Enda lama udah nya kami dibai pulai ke Semenanjung lalu ba taun 1966 dibai baru ke Kuching sebedau dianjung ngagai Taiping.
“Maya taun 70-an kami dibai pulai baru ke Sarawak alai berengkah belaban sereta ngemunaska munsuh komunis,” pia ku iya.
Asal penatai Manju tu sama enggau Bujang Berani niang Datuk Temenggong Kanang Langkau iya nya ari Kerangan Manuk, Julau.
Nyangka sebedau tu, bala mayuh enda ngadang bisi Bujang Berani bukai kelimpah ari niang Kanang bela datai ari Kerangan Manuk, Julau.
Manju dikangau nyadi Sarawak Renjer kena 8 Oktober 1963 sebedau disilih nama enggau 1st Rejimen Renjer Diraja.
Udah 10 taun nyadi soldadu, iya nadai pilih bukai kelimpah ngemaduka diri taja ati amat agi ka ngetanka pengelikun menua ketegal nadai ngibun apai indai iya ke udah tuai di menua.
Kenyau ari nya, iya berengkah nyingkang ba pengidup baru alai belabuh ngidupka diri enggau pengawa bumai sereta betanam betupi.
Ari pengarap sida semenua ngagai iya, Manju dipilih nyadi Tuai Rumah berengkah ari taun 1991 di Lepong Mujan, Julau sebedau pindah ke Tinting Nanas Madu, Jalai Meluan-Entabai.
Ba bulan Julai taun tu tadi, ketegal ti udah tuai, iya ngelengkaka tanggungpengawa nya ngagai sida ke biak agi nyadi Tuai Rumah.
Ari lima iku anak iya, diatu iya ke pengkuan bela nitihka singkang iya nyadi raban pengetan pengelikun menua.
Anak iya tu, Sarjan Tonnyson Manju diatu gawa ba Kor Ordnans Diraja ba kem soldadu di Pahang.
Udah ke kena strok bulan Disember 2017, Manju enda baka suba nyau enda regas agi.
Ketegal nya, saup ari piak bekaul patut bendar diberi ngagai iya ti udah kala berambunka seput ngetanka pengelikun menua.
Kediatu iya begunaka amat bantu baka ‘ kerusi roda’ dikena ngelantangka agi iya mindah kin-kitu.
Piak bekaul tau datai ngelawa Manju ba Rumah Franky, Tinting Nanas Madu, Jalai Meluan-Entabai.
Kelimpah ari nya, penerang silik bekaul enggau iya tau mega ditanya ba anak iya, Jimmy Manju nengah lumur 019-468 3755.