Penerebai bilun Sibu-KK mengkang nganti pemutus Peminta nya udah dianjung ngagai Opis Menteri Perengka Pengangkut enggau AirAsia tang bedau nerima saut
SIBU: Menteri Muda Dagang Temuai, Seni enggau Main Asal Datuk Lee Kim Shin madahka peminta ngaga penerebai bilun ari Sibu-Kota Kinabalu (KK) agi mengkang nganti pemutus.
Iya madah, peminta nya udah dianjung ngagai opis menteri sida sebedau tu kelimpah bela dikenataika ngagai Opis Menteri Perengka Pengangkut enggau AirAsia.
“Kitai agi nganti peminta tu dikemendarka.
“Aku melabaka AirAsia merambu deka ngaga penerebai bilun Sibu-KK,” pia ku iya maya nimbal tanya pengarang berita.
Dulu agi ari tu iya ditanya bekaul enggau pen- gawa perintah nengeri nyaut peminta rayat Sibu ti deka digaga penerebai biliun nya ngena bilun ke besai agi kelimpah ari MASwings.
Sebedau nya, Lee ngarika Kepala Menteri Datuk Patinggi Abang Johari Tun Openg bejadika Mamma MiaThe Musical di Kingwood Hotel ditu, malam ensana.
Lee mega madahka iya enda nemu kemaya pemutus nya dibantai opis menteri bekaul.
“Kami enda nemu kemaya tang udah digaga Opis Menteri Perengka Pengangkut.
“Kebuah pia, semua tu sebedau tu dipegai RAS (Servis Penerebai Bilun Menua Pesisir) ti bela bekaul enggau subsidi enggau pekara bukai.
“Ketegal nya, kami manggaika pekara tu ngagai Opis Menteri Perengka Pengangkut.
Ditanya sagam ati iya ke- maya pemutus nya dibantai iya nimbal “Kitai endang ngingingka pekara tu nyadi enda lama agi. Nya alai kitai bebendar mantaika isu tu sebedau tu.”
AirAsia ngetu ngatur penerebai bilun nengah jalai nya kena Ogos 2009 sepengudah empat bulan bepun ari MASwing diberi hak eksklusif ari perintah ngatur servis pener- ebai bilun menua pesisir.
Bekaul enggau perebai bilun terus Bintulu-Singapo ditandu baru, Lee madahka semua kompeni penerebai bilun komersil randaka mayuh orang nepan.
“Ba aku, ketegal ti enda mayuh nepan sida patut ngetu,” ku iya ti mega Kaban Kunsil Nengeri ( ADUN) Senadin.
Sebedau tu, AirAsia bisi ngaga penerebai bilun Bintulu-Singapo kena 27 Disember 2017.
Dulu agi ari tu, bekaul enggau program teater nya, Lee madah tu keterubah iya program nya digaga di Sibu.
“Ngelama tu pogram nya digaga kitai di Kuching aja lalu nyangka nangkan ke tu deka dibai ngagai sitak bukai,” pia ku iya nerang.
Ketegal nya, kami manggaika pekara tu ngagai Opis Menteri Perengka Pengangkut. Datuk Lee Kim Shin Menteri Muda Dagang Temuai, Seni enggau Main Asal