Perintah GPS nyiping ADUN Pakatan Harapan, ku Dr Ting
MIRI: Kaban Kunsil Nengeri ( ADUN) Pujut Dr Ting Tiong Choon madahka perintah GPS nyiping bala ADUN Pakatan Harapan (PH) ditu enggau enda ngagihka sida sebarang belanja.
“Genap kaban GPS nengeri nerima RM7.25 juta agih belanja lalu bala kaban MP GPS nerima mayuh agi ari nya, laban sida nerima RM7.25 ari perintah GPS sereta RM300,000 agi ari Perintah Besai PH.
“Tang bala ADUN PH Sarawak nadai nerima sebarang agih belanja ari GPS,” ku iya madah ngagai pengarang berita pengudah Aum Besai Ninting Taun (AGM) DAP Miri-Senadin kena Hari Enam tu tadi.
Nitih ku Dr Ting, bala ADUN PH ditu deka terus nagih agih belanja laban sida ngasaika diri ditipu, enda mantaika pekara tu lebuh aum kunsil nengeri nyin tadi.
“Nya alai kami deka seruran nagih pekara tu, kami deka ngemai pekara tu maya aum DUN udah tu.
“Kitai udah dikemelikka Kepala Menteri (Datuk Patinggi Abang Johari Tun Openg). Iya melakun baka iya deka ngagihka kitai enggau sekeda belanja sebedau aum DUN, nya kebuah kitai enda mantaika pekara tu lebuhka baum.
“Tang iya nadai ngagih sesen pan. Ba penemu kitai, kitai ngasaika iya sengaja ngaga baka nya ngambika kami enda mantaika pekara bekaul enggau agih belanja ba DUN.
“Kitai ulih nyamin sida, kitai deka mai pekara tu ba aum DUN udah tu, ti deka diatur dalam bulan Novemver,” ku iya nampung.
Ba lansa bukai, Dr Ting mega meri tabi puji ngagai Sekretari DAP Sarawak, Alan Ling ti udah dipilih nyadi siku ari 12 iku kaban ti deka ngangkat sumpah nyadi Senator dalam Parlimen sehari tu (Hari Satu).
“Kitai deka meri tabi puji ngagai Alan Ling, laban iya siku ari kaban DAP keterubah ari Sarawak dipadu nyadi Senator.
“Iya deka ngangkat sumpah sehari tu lalu aku pechaya iya deka gawa ngena chara ti lurus. Lalu PH diatu bisi siku ADUN, siku MP (Dr. Michael Teo) enggau siku Senator di Miri. Kitai chukup temegah enggau pekara tu,” ku Dr Ting.