Pengawa seni nengeri tu deka terus dikemansangka perintah: Abang Johari
SIBU: Perintah nengeri ngemeratka pengawa ngemansang seni nengeri tu seririh enggau pengeliat ati napi penguji globalisasi maya hari tu.
Kepala Menteri Datuk Patinggi Abang Johari Tun Openg madah, seni enggau main asal siti ari refleksyen ngagai identiti bansa ba pengawa mantaika daya diri nempuh pengidup beseharisari.
“Nya alai, kitai ulih meda macham bengkah seni ditempa sereta dibantai nengah panggau baik nya dibantai nengah chara tradisional, moden tauka kontemporari.
“Pematut kitai meda seni enggau main asal ba tikas ti tinggi tau disebaka enggau meda pengawa bukai ti beguna berindik ari pemanah ulah dalam kitai mayuh patut dipandangka.
“Enggau jaku bukai, kitai meseti mai pekara tu enggau chara ti sebela lalu ngelawa tuju nempa pemanah kaul enggau pengelikun pengidup dalam bala mayuh,” pia ku iya madah.
Iya mantaika jaku tu nengah teks ke dibacha Menteri Muda Dagang Temuai, Main Asal, Seni Nengeri Datuk Lee Kim Shin maya pengerami bejadi Mamma Mia! The Musical 2018 ke diatur ba Kingwood Hotel, malam kilah ensana.
Sama bela datai maya pengerami tu iya nya Sekretari Mendam Opis Menteri Dagang Temuai, Seni, Main Asal, Nembiak Lumba enggau Main Nengeri Hii Chang Kee, Ketuai Pemesai Eksekutif Kaunsil Seni Sarawak Sharkawi Amit enggau Direkter Program Yap Chiew Phin.
Abang Johari mega madah, program Mamma Mia! The Musical 2018 ti dikemujurka raban Koir Simfoni Orkestra (SONS) nya siti singkang ti positif ke ngaul aktivis seni genre moden ba panggau.
“Aku ngasaika program tu ngenataika siti ‘aura’ pengelikun enggau penyerakup rayat Sarawak.
“Penyerakup enda ngira bansa enggau pengarap bela tau datai nengah produksyen panggau, ejensi, media enggau mensia mayuh ke datai meda.
“Manah amat enti chara baka tu dikena kitai sereta bela ditemu bala mayuh ba pengeransing kitai ngintu pengelikun enggau pengelantang pengidup,” ku iya madah baru.
Abang Johari enggau tu ngarapka program baka nya ulih ditandu ngambika nyadi siti ari produk dagang temuai ti tau matak penatai temuai menua luar.
“Ketegal nya, aku andal amat program tu bela nyadi produk ti tau dipasuk ba kelender opis menteri dagang temuai nangkan ke tu ila.
“Pengandal tu bepun ari kitai ukai semina deka ngemansang sereta ngelakuka program seni enggau main asal aja tang bela ransing ngemansangka produk seni pupu bansa ti mega nyadi chara dikena ngemayuhka agi produk dagang temuai dalam nengeri,” pia ku iya madah.
Mamma Mia! The Musical 2018 diatur Kaunsil Seni Sarawak (MSS) ti dikemu- jurka SONS bela nerima saup ari raban Sri Sarawak ari Kuching enggau Sri Budaya Bintulu.
Kelimpah deka mantaika seni ba mensia mayuh nengeri tu, program nya mega nyadika platform kerejasama antara piak pengatur enggau ejensi perintah sereta kompeni luar ba tuju bela ngemansangka seni enggau main asal Sarawak.
Awak tu mega dikena SONS Koir mantaika diri ngagai mensia mayuh ari luar Kuching.