Chara betanam betupi lama enda engkeman agi dikena lalu kitai patut nitihka ubah pemansang nguna chara moden
SKRANG: Raban orang bumai patut berani ngubah chara betanam betupi ari chara lama ngagai chara moden sereta besai dikena ngulihka untung besai.
Kaban Kunsil Nengeri (ADUN) Engkilili Dr Johnical Rayong Ngipa madahka chara betanam betupi chara lama enggau ungkup diri empu enda entu engkeman lalu enda ulih dikena agi nyerumba pemansang teknologi, chara ngeluar, ngelaku diatu majak maju enggau bemacham bantu disediaka perintah.
“Nya kebuah, deka tauka enggau, pengawa betanam betupi baka bumai, nupi manuk, itit enggau ikan, ti dikemeran sida suba ungkup guna diri empu patut diubah ngagai chara moden tauka digaga besai,” ku iya.
Iya mansutka jaku nya lebuhka bejaku ba Program Merarau Gerempung Orang Bumai Pelilih (PPK) Engkilili/Lubok Antu 2018 berambaika jaku ‘Memartabatkan Pertanian Bersama Peladang’ ba Balai Dr Johnical Rayong Ngipa, Skim Skrang, Skrang kemari.
Pia mega ku iya, bala komuniti kelebih agi raban nembiak enggau graduet ti bedau bisi batang pengawa patut meda lalu nempa pengawa betenam betupi tu nyadi kereja baru ti tau mansutka belanja besai enggau tetap.
“Kitai patut berani ngubah runding lama ti ngumbai pengawa betanam betupi semina ungkup sida ke tuai enggau peranak genturung pendiau, tang ngaku pengawa tu siti dagang ti tau mansutka belanja bepuluh ribu ringgit sebulan,” ku iya.
“Bekenaka pengelandik enggau bantu ti disediaka perintah nengah Opis Betanam Betupi ke bisi ba tetiap bagi menua enggau pelilih nengeri tu, juluk deka nempa orang kaya ari pengawa betanam ukai pekara ti enda ulih dijapai,” ku iya seraya nambah, diatu Sarawak udah nempa mayuh raban bumai ti mujur enggau penatai pemisi ngelui ari lima lumur sebulan.
Ngelansa pasal makit, iya ngarap tu ukai penekul ngagai raban bumai betupika jelu enggau betanam laban perintah Sarawak udah numbuhka mayuh Palan Ngumpul produk betanam betupi lalu palan pemadu semak ba menua tu iya nya Palan Ngumpul ba Layar ti dipejalaika Opis Dagang Betanam Betupi Perintah Besai (FAMA).
“Taja pia, aku deka berandau enggau ejensi perintah bekaul ngambi numbuhka sebengkah palan ngumpul mit ba Skim Skrang kelebih agi ungkup kandang ngelingi Betong, Engkilili enggau Lubok Antu dikena nyamin kualiti jelu tupi enggau asil produk betanam dipansutka ba bagi menua tu,” ku iya.
Dr Rayong mega ngemeratka pemesai guna raban dagang ngambi betanam enggau nupi lebih ari sebansa jelu tauka utai tanam dikena nyamin pemansut maya rega produk komoditi labuh.
“Diatu kitai napi rega komoditi baka sawit, lada, koko enggau getah labuh, ngujungka sida ti bekebun enggau betanam ngalih ngagai chara bukai ngiga belanja. Rega mar ditaga laban iya ngaul rega enggau peminta makit dunya,” ku iya.
“Nya kebuah perintah nengeri endang ngansak rayat ngaul diri lebih ari siti produk aja dikena nyamin penatai pemisi rayat meruan RM4,000 sebulan datai ba taun 2030,” ku iya.
Ku Dr Rayong, patut amat rayat ngetanka nengeri tu dipegai kuasa luar laban semina peranak menua tu ulih ngelangkar enggau ngatur pengawa nengeri tu.
“Pengawa ditegi niang Tok Nan bedau tembu lalu pengawa niang ditampung Kepala Menteri Datuk Amar Abang Johari Tun Abang Openg begulai enggau rintai ketuai nengeri ke bukai, bebendar minta hak MA63 dipulaika baru lalu royalti minyak enggau nadai beleman.
“Kitai enda ulih ngelempaika pengandal ngagai Perintah Besai ke diatu dipegai Pakatan Harapan laban udah chukup kitai meri awak ngagai sida nentu sereta ngaga pemutus ungkup peranak Sarawak,” ku iya enggau meri chunto ba pemujur parti Warisan Sabah ningkilka parti ari Semenanjung Malaysia.
Ba lansa bukai, atur pengawa bisi diatur beserimbai enggau pengawa merarau baka pengawa nyuaka bantu zakat, bantu kereban ngepunka dagang, nyuaka insentif ngagai nembiak nyulut ba peresa PT3, SPM enggau bala anak kaban PPK ti diterima nampung pelajar ngagai universiti, bantu sida ti tasah angus ba Rumah Engkabi Jamu, San Semanju diterima pengari raban Volunteer JKM Nancy Rangkung.
Berebak enggau nya, Dr Rayong mega ngemendarka geran MRP ngagai PPK Engkilili/Lubok Antu penyampau RM10,000.
Sama bisi datai Chairman PPK Engkilili/Lubok Antu kaunsilor Agas Thomas, Menijar PPK Sarawak Kinta Lalang, Sekretari Norina Lambor, bala pengari opis perintah, penghulu Betuk Tubi, Penghulu Nyambong Mawing, bala kaunsilor, tuai rumah, pesereta PPK ari kededua bagi menua sereta bala komuniti ngelingi DUN Engkilili.
Nya kebuah, deka tauka enggau, pengawa betanam betupi baka bumai, nupi manuk, itit enggau ikan, ti dikemeran sida suba ungkup guna diri empu patut diubah ngagai chara moden tauka digaga besai. Dr Johnical Rayong Ngipa ADUN Engkilili