Kelab Lion diperansang bekerejasama enggau NGO bukai ngatur aktiviti

KAPIT: Kaban Kunsil Nengeri ( ADUN) Bukit Goram Jefferson Jamit Unyat minta raban Kelab Lion bekerejasama enggau raban Gempung Ukai Dikuasa Perintah (NGO) bukai ngatur aktiviti begulai seraya bejalaika servis komuniti.

“Aku dekaka Kelab Lion bekerejasama enggau raban kelab enggau gempung bukai menua tu nyengkaum raban NGO sereta ngatur aktiviti begulai ti meri fokus ngagai servis komuniti baka EyeSight First Campaign, Green Environment, Food for Hunger, Pengerai Komuniti sereta ulih nyediaka servis ngagai mensia mayuh ti begunaka bantu sereta nambahka pemanah tanggam kaul kereja antara rayat ari pupu bansa ngetanka pengelikun enggau pengelantang dalam raban bansa,” ku Jamit ngansak.

“Aku ngarapka bala kaban Kelab Lion Kapit deka bek- erejasama rat begulai enggau mayuh bengkah ejensi perintah enggau bala ketuai politik ti megai perintah di baruh pegai Kepala Menteri Datuk Patinggi Abang Haji Abdul Rahman Zohari, bejalaika pangku pengawa sukung dikena nyediaka input, nyara penemu enggau langgur penemu dikena ngemai pemansang ngagai Kapit,” ku Jamit.

Iya mansutka jaku nya kena lemai Hari Enam rambau pengawa bejadika Pengerami Makai Lemai Ngelancharka Pengawa Nyiri Komiti Baru Kelab Lion Kapit enggau Kelab Lion Song diatur ba Palan Sivik ditu, lalu udah digulu urung 300 iku kaban ari Kelab Lion Pelilih 308 A2 diketuaika Gabenor Pelilih, Tiong Yong Tiing.

Iya minta bala kaban komiti baru Kelab Lion Kapit ulih bejalaika tanggungpengawa sida ngintu pengelantang bala kaban enggau komuniti di Kapit.

“Kereja kita nadai kala enda dibalas. Balas tu bemacham pekara lebuh mantu orang bukai ti begunaka bantu. Raban Kelab Lion seruran mantu sereta deka ngasuh tetiap pengawa sida gawaka komuniti ti begunaka bantu. Aku ngarapka bala kitai dalam taun ti ti deak datai, meseti ingat sereta gawa mayuh agi,” ku Jamit.

Ngelansa pasal pengawa lemai nya, ku iya, tu sebagai ari tradisi ngemata pengawa nyiri enggau menggi pangku pengawa ngambika bekalih kuasa deka lanchar ngetuaika kelab ba penggal ke baru.

Tu mega dikena ngenang pengawa dipejalai bala kaban kelab Lion ti udah kiruh sereta puh bejalaika aktiviti sida pulaika pemaik ngagai bala kaban enggau bala bukai ngelama tu.

Pemujur atur pengawa betukar pangku pengawa enggau kuasa antara bala kaban enggau ketuai kelan sereta kerejasama rat kesemu kaban ngujungka kelab mujur mutarka pemar ditapi sida ngelama tu, kenyau ari ditumbuh 26 taun ke udah, ku Jamit.

Berebak enggau pengerami nya, Jamit bisi ngemendarka geran perintah bela penyampau RM5000 ngagai Kelab Lion Kapit enggau Kelab Lion Song.

Gabenor Pelilih Tiong Yong Tiing dipebasa bejadika pengawa sehari nya.

Tiong Yong Tiing, Mandal Keterubah Gabenor Pelilih Dr Gan Kean Siong, Mandal Kedua Gabenor Pelilih Roland Chieng Yew Hee, chairperson Bagi Menua 2 Joseph Yong Poh Lai, Chairperson Zon 4 Hii Yik Ping, MP Kapit Datuk Alexander Nanta Linggi sereta bala bukai bisi ngulu pengerami lemai nya.