Kapit ukai enda mansang tang rayat deka meda mayuh agi pemansang

KAPIT: Kaban Parlimen (MP) Kapit, Datuk Alexander Nanta Linggi nyemetak madah enda manah madahka kitai nadai utai dikemisi di Kapit laban kitai patut ngenang pengawa ti udah dipejalaika perintah ngelama tu.

“Aram kitai bela lurus ati. Enda manding kitai madahka diri nadai utai dikemisi, nadai jalai, nadai pemansang, ngelama tu kelebih agi enam tauka tujuh taun ke udah. Perintah udah naka ulih ngerumban pemansang infrastruktur enggau penyikap perengka guna pemun.

“Kitai enda ulih ngenggaika diri bisi pemansang, jalai udah digaga, bekal ai enggau bekal kuasa karan disambung enggau ke bukai. Kitai bisi pemansang, kitai semina dekaka mayuh agi pemansang laban kitai randakka pemansang.

“Sebarang pekara dikembuan kitai, kitai meseti ngenang. Kitai udah jauh nyulut dalam sukut pemansang infrastruktur enggau penyikap perengka guna pemun. Ngelama tu, udah mayuh pekara dijapai kitai,” ku Nanta rambau pengawa bejadika Pengerami Makai Lemai Ngelancharka Pen- gawa Nyiri Komiti Baru Kelab Lion Kapit enggau Kelab Lion Song diatur ba Palan Sivik ditu, lalu udah digulu urung 300 iku kaban ari Kelab Lion Pelilih 308 - A2.

Ku iya, dulu suba enda terundingka diri ulih deriba ari Song ngagai Kapit ngulu pengerami lalu mulaika diri nengah jalai. Peranak Song, sida mindah nepan bot ekpres lalu diau bemalam.

Nanta ngelaluka penatai semua kaban kelab Lion ti datai ari menua luar napatka menua Kapit deka ngemataka pengawa nyiri pangku pengawa.

“Bisi kebuah patut bejalaika pengawa tu, Kelab Lion Kapit enggau Kelab Lion Song ngatur begulai kelebih agi diatu semina sejam aja deriba ari Song ngagai Kapit. Dalam kelab tu, kitai gawaka pangan diri. Siku enda ulih nyingkang jauh, kitai bela ngerembaika pengawa pengasih, ngintu pengelantang sereta kiruhka pangan diri.

“Aku pechayaka kelab tu sebengkah gempung ti manah, ke alai ulih disaup genap iku kitai. Aku chukup temegah ati madah mayuh peranak di Kapit gerah jari sereta seruran deka mantu,” ku Nanta.

Ku iya, pemansang meseti sebela ba runding enggau fizikal. Enda manding enti pemansang infrastruktur enggau penyikap perengka guna kelas satu tang runding agi kelas tiga. Pemansang meseti holistik dikena nyemelaka runding enggau fizikal ke alai peranak diajar enggau pemanah ulah sereta siru enggau nadai minta balas.

“Aku muji pengawa ti udah dipejalaika raban kelab Lion ungkup kitai ba Kapit enggau Song. Ngarapka bala kita semampai mujur ba atur pengawa lalu kelai sukung, aku ngemendarka agih belanja bela penyampau RM10,000 ngagai Kelab Lion Kapit enggau Kelab Lion Song, dikena kita ngatur aktiviti,” ku Nanta.

Antara bala bisi datai Gabenor Pelilih Tiong Yong Tiing, Mandal Keterubah Gabenor Pelilih Dr Gan Kean Siong, Mandal Kedua Gabenor Pelilih Roland Chieng Yew Hee, chairperson Bagi Menua 2 Joseph Yong Poh Lai, Chairperson Zon 4 Hii Yik Ping, MP Kapit Datuk Alexander Nanta Linggi sereta bala bukai.