Ketegal nya perintah Negeri Sarawak beratka peranak nengeri tu ngambika landik ba Jaku English, ku Abang Johari
MIRI: Perintah Nengeri Sarawak beratka peranak nengeri tu landik ba Jaku English ngambika sida tetitihka singkang ba Revolusyen Industri 4.0 lalu ulih besemekih enggau pengelandik penemu sereta komunikasyen.
Kepala Menteri Datuk Patinggi Abang Johari Tun Openg, madah munyi tu kemari lebuh bejadi edisyen kedua Simposium Pelajar Jaku English Sarawak (Seles) 2018 ke diatur kena 27-29 Ogos disebuah hotel ditu kemari.
Ku iya, enti landik ba jaku English sida ulih ngaga pansik ba sains enggau teknologi ngambika sida bisi pengelebih lalu nyulut ba jaku penyambung antarabansa ti nyendiaka pengelebih ngagai peranak Sarawak enggau nengeri.
English diatu nyadi jaku kedua rasmi di Sarawak nangkanka Bahasa Malaysia, lalu ke kebuah praktikal, nengeri ngembuan juluk dekaka pengereja pengawa nengeri tu sikar sereta beguna ba mayuh bengkah kompeni antarabansa enggau menua tu empu, ke begunaka pengereja pengawa ti landik bejaku English.
Ba jeman dunya ke bisi kaul enggau sereta sama begunaka pangan diri, pengelandik ba jaku English nya beguna amat dikena ngulihka pemadah, mereti sereta ngemeranka teknologi baru, nguna peluang ba renggat global lalu nyulut nguasa penemu enggau makit .“Kita enda ulih nguna rengka ke baru enggau manah baka ipad tauka rengka ke dikena ninting hari enti kita enda meretika atur, ke suah agi ngena jaku English, enda ngira sekalika kita deka tauka enggai, “ku iya.
Ku iya, nya beguna amat ngagai nengeri ti deka meri pemansang ba Ekonomi Digital sereta ngembuan pengereja pengawa ke landik dalam bidang teknikal enggau jaku English ngambika ulih ngaul orang bukai enggau industri ba renggat ekonomi global.
Nyadi jaku ke diguna ba dagang antarabansa enggau konferen, Malaysia deka tinggal lalu enda ulih nyereta enti bisi penimpang ba jaku tu, lalu enda setipak enggau gaya pengelebih pemansang ti dipejalaika.
Nengeri Sarawak kaya ba mayuh bengkah bio enggau pengeraja asal ke ulih diserungkai nengah pansik, lalu tranformasyen betanam betupi dipejalaika ngena teknologi ke semina ditegu ‘button’ dikena nyaga pemansut enggau proses ke bukai.
Ku Abang Johari, perintah udah beranakka puku ba pengawa nempa pengelandik nengah institusyen tinggi eng- gau pemansang pengelandik di nengeri tu ke dipelanja, nyengkaum Swinburne enggau Curtin Universiti.
“Raban graduet tu bisi peminta ba pekara ekonomi, kelebih agi sektor peribit ke alai sida beguna ba entara renggat enggau mayuh beng- kah kompeni antarabansa di dunya tu, “ku iya.
Nengeri mega begunaka mayuh agi raban sainstis nempa produk komersial ari pengeraja asal baka ai ke enda diguna agi ke tau ditukar nyadi kuasa gadung ngena teknologi.
Kepala Menteri mega madahka pengawa ngeluarka minyak hidrogen gadung nengah hidrolisis ti ulih mantu rampa menua majak gadung agi, meri pengelebih kredit karbon ngagai Sarawak.
Ku iya baru, Sarawak enda tau enda nempa orang ke landik ti ulih diambi gawa mayuh bengkah kompeni antarabansa .
Iya mega muji Opis Menteri Pelajar, Pansik Sains enggau Teknologi (MESTR) ke udah ngatur simposium pengelama tiga hari nya, ke tau nyadika pelasar ngagai bala pakar antarabansa bekunsika penemu enggau bala pengajar sereta pengatur pengawa sekula di menua tu.
Bisi 900 iku pesereta, nyengkaum 800 iku pengajar enggau 31 iku pemesai opis pelajar pelilih menua udah nyereta simposim pengelama tiga hari nya ti berambaika leka jaku“Creativity: Inspiration to Implementation”.
Sama bisi datai Menteri MESTR Dato Sri Michael Manyin Jawong, Menteri Muda Pelajar enggau Pansik Teknologi Dr Annuar Rapaee sereta sekretari mendam MESTR Dato Sudarsono Osman, Menteri Muda Pengelantang Pendiau Komuniti, Ruang Bilik enggau Pelajar Tumu Nembiak Mit Rosey Yunus, Menteri Muda Adat enggau Main Asal, Datuk John SikieTayai, Menteri Muda Dagang Temuai, Seni enggau Main Asal Datuk Lee Kim Shin sereta bala pemesai ke bukai.
Kita enda ulih nguna rengka ke baru enggau manah baka ipad tauka rengka ke dikena ninting hari enti kita enda meretika atur, ke suah agi ngena jaku English, enda ngira sekalika kita deka tauka enggai. Datuk Patinggi Abang Johari Tun Openg Kepala Menteri Sarawak