Taja nadai agi bantu ari Perintah Besai tang pengawa nuchuk vaksin tetap disambung nengah JPV Sarawak
KUCHING: Pengelekai penyakit rabies di nengeri tu dilempaika ngagai Komiti Pengatur Penusah Ngenyit Nengeri (JPBN) lalu mandangka perintah nengeri sigi beratka isu tu sereta nyebut iya siti penusah.
Sapit Kepala Menteri Datuk Amar Douglas Uggah Embas madah atur ngelempaika penyakit rabies ba baruh JPBN deka ngemuntang komiti-komiti perintah digerah besaup nengah semua agensi bekaul.
Iya madah nyemetak, perintah udah ngaga atur lengkas ba kes keterubah ditemu lalu dikenuku.
“Kes mensia positif rabies keterubah diripot kena 30 Jun 2017. Kes positif rabies jelu keterubah iya nya kena 4 Julai 2017. Komiti Pengatur Penusah Ngenyit Nengeri Sarawak (wabak rabies) ngatur aum keterubah kena 4 Julai 2017 pengudah kes positif dikenuku nyadi nuntung mensia enggau ukui.
“Bilik- bilik operasyen dibuka ba Wisma Bapa Malaysia dipejalaika JPBN nengah Opis Servis Veterinar (JPV) Sarawak (Raban Sikar Nyaga Ngintu, Meri Vaksin, Peresa Makmal Rabies Jelu) enggau Opis Pengerai Nengeri Sarawak ( Palan Penyikap enggau Nerima Timbal Penusah, Klinik Ketup Ukui).
“Tambah mega ba sitak ke dirampit rabies, pemesai residen enggau pelilih mega bisi nurun ngabas komuniti,” ku iya nengah sebengkah randau khas begulai enggau The Borneo Post ditu kemari.
Uggah ke mega chairman JPBN Sarawak madah nyentuk 27 Ogos 2018, 75,544 jelu ke udah dituchuk vaksin enggau ari penyampau nya, 69,327 dituchuk ngena dos keterubah vaksin rabies ditangkan 6,217 dituchuk baru ba serata menua.
“Semua jelu ke dituchuk JPV Sarawak sigi enda bebayar. Penyampau nya enda nyengkaum ke dituchuk vaksin nengah doktor jelu ba palan swasta.
“Ba serata Sarawak, pengawa meri vaksin anti rabies ba ukui agi dipejalai lalu nyau deka ninting hari program besai bisi diatur lebih agi maya ujung minggu ba sitak ke ngembuan mayuh ukui.
“Bisi 146 program besai meri vaksin dipejalai ba selampur Sarawak nyentuk haribulan tu (27 Ogos 2018) lalu nya ukai munyi dipadah YB Chong (Chong Chieng Jen). Tambah mega Kepala Menteri, Datuk Patinggi Abang Johari Tun Openg datai ngulu program meri vaksin ke mayuh tu,” ku iya.
Uggah madah munyi nya nimbal jaku dipansutka Chairman Parti Tindakan Demokratik (DAP) Sarawak nya ti mayuh dikerembai ba media jam ke diatu.
Iya mega madah JPV Sarawak benung bejalaika pengawa renggat kedua meri tuchuk ngagai sitak 650 kilometer Zon Bungkur Dijaga Ari Penyakit ba sepanjai adan Kalimantan, Indonesia dikena nyaga ukui tupi rayat di nengeri tu.
“Pia mega, peransang enggau vaksin bru nya digaga ba zon penampang di bagi menua Sibu dikena nyeliah penyakit rabies majak ngerekai ngagai bagi menua bukai di Sarawak.
“Program ngintu veterinar benung digaga ba semua pintu tama nengeri tu,” ku iya.
Iya madah laban rabies dir- intai nyadi Program Dijaga ari Penyakit Nasional, JPV Putrajaya deka mantu Sarawak nengah chara nyendiaka Pemesai Veterinar endur bejejaga, meri vaksin, ngaga peresa rabies di Palan Pansik Veterinar enggau palan latih ditumbuh deka dilatih numbuhka Perengka Guna Peresa Rabies di Sarawak.
Uggah mega madah nyentuk 7 Ogos 2018, semua peresa rabies digaga ba Makmal Diagnostik Veterinar Nengeri.
Atur nya ku iya dikena ngemuntang Raban Sikar, JPV Sarawak aktif ba sitak ke bisi rabies lalu madah pengawa nganjung sampel ke Ipoh ungkup dikenuku kes, Sarawak meseti mayar RM1,500 ungkup genap sampel.
Uggah mega madah bisi takah dalam nyendiaka vaksin rabies enggau pemesai ari JPV Perintah Besai.
“Kitai dipadah, nengah Ketuai Direktor JPV Malaysia kena 7 Jun 2018, opis nya nadai chukup belanja dikena nganjung pemsai ngagai Sarawak lalu minta JPV Sarawak meli vaksin ngena bajet nengeri.
“Berebak enggau nya, kitai mega bisi minta belanja ari Kepala Menteri ke lalu lengkas ngemendarka belanja un- gkup tuju nya sereta awakka kitai ulih terus meri vaksin anti rabies percuma. Servis sukung ari JPV Perintah Besai semina disambung baru kena 15 Ogos 2018,” ku iya.
Ku Uggah dikena nagang pengelekai rabies enggau ngasi, kerejasama mensia mayuh enggau orang ke menggi jelu beguna amat.
Ku iya endang nyadi tanggungpengawa orang ke ngempu jelu minta betuchuk vaksin awak nyeliah jelu ditupi sida ari rabies.
“Aktiviti bukai ke beguna amat benung dipejalai baka kimpin penyedar nengah media rama, media chelak, stesyen radio, laman web rasmi enggau mayuh agi ke bukai ba serata nengeri...” Kitai begunaka sukung ari mensia mayuh munaska rabies.
“Perintah Sarawak berati penyakit tu chukup besai lalu naka ulih nagang iya kelimpah munaska penyakit tu enggau lengkas,” ku iya.
Tandu iya, naka tu perintah nengeri udah nguna belanja lebih RM20 juta dikena ngelaban penyakit rabies.
“Kitai endang ngelalu buah penemu ke manah ari raban, orang landik tauka sapa-sapa ke nguji mantu nagang penyakit tu,” ku iya.
Ba serata Sarawak, pengawa meri vaksin anti rabies ba ukui agi dipejalai lalu nyau deka ninting hari program besai bisi diatur lebih agi maya ujung minggu ba sitak ke ngembuan mayuh ukui. Datuk Amar Douglas Uggah Embas Sapit Kepala Menteri Sarawak