Alan Ling Senator keterubah dipilih ari Sarawak dibaruh PH
MIRI: Sekretari DAP Sarawak Alan Ling kemari mujur angkat sumpah nyadi Senator Dewan Negara lalu nyadi Senator keterubah ari Sarawak ngereja tanggungpengawa nya dibaruh perintah Pakatan Harapan (PH).
Alan, 35, mega siku luyar, kelimpah nyadi sekretari DAP ba renggat nengeri, ke mega Pemantu Sekretari Besai Nembiak DAP Nasional, lalu iya mega Senator pemadu biak dipadu, naka tu.
Iya disempulang bini iya Florence Lau, apai iya TK Ling sereta bala ketuai parti ke bukai kelimpah bala bakih, bela angkat sumpah kemari begulai enggau 11 iku Senator baru ke dipadu.
Dewan Rakyat bisi 70 Senator lalu tebal agi sida agi bala kaban parti Barisan Nasional (BN) ke diatu enggau ex-parti komponen BN.
Nangkan nya, Alan siku graduet Sheffield University, United Kingdom (UK) ba bidang undang-undang, sigi chakah ba pengawa nyadi ketuai maya agi belajar lalu iya kala mangku pengawa presiden Raban Nembiak Undang- Undang Malaysia ba UK.
Diatu kelimpah chakah ba pengawa parti, iya mega bisi ngembuan palan luyar ke ukai semina nyendiaka servis luyar ungkup peranak Sarawak, tang mega ngagai Semenanjung Malaysia.
Iya mega siku orang ti landik belaban penemu sereta bejaku ba mua mayuh sereta nyamai dilawa, tambah mega iya ex- pengari rayat iya nya Kaban Kunsil Nengeri (ADUN) Piasau pengelama sepenggal sebedau ke alah ngetanka penuduk nya ba Pengawa Bepilih Kunsil Nengeri (PRN) 2016 suba.
Berebak enggau nya, bala kaban DAP Miri bela meri pengaga ati ngagai tanggungpengawa baru nya, iya meri terima kasih ngagai Menteri Besai ke chukup gaga ati enggau pengawa milih iya.
“Kami chukup temegah ati enggau Alan lalu iya lebih beguna, iya diatu udah ba penuduk nyadi Senator ba Dewan Rakyat, nya deka mantu laban iya ulih bejakuka penanggul ditapi nengeri enggau rayat di nengeri tu,” ku Ketuai Nembiak DAP Miri Peter Hii.