Pengerichah Pesta Pakan ngayanka tikas ekonomi rayat nyau majak manah
PAKAN: Pesta Pakan majak richah kenyau ari 20 taun ke udah pengerami tu diatur lalu tu ngayanka tikas ekonomi rama peranak menua tu nyau majak manah.
Kaban Kunsil Nengeri (ADUN) Meluan, Rolland Duat mansutka pekara tu rambau bejadika pengawa nutup Pesta Pakan ditu malam Hari Enam tu tadi, temegah agi meda pemayuh dedat mensia sepanjai semilan hari atur pengerai, enggau pemisi sambung jalai ti meruan sereta tikas pengidup rayat majak manah.
Iya pechaya pengawa ngaga infrastruktur pemun, kelebih agi jalai enggau jematan udah mantu ngemajuka aktiviti betanam, ti udah ngangkatka tika idup sida.
“Diatu sida udah meli kerita tauka entukar 4WD ngambika sida ulih lantang mindah. Aku pechaya, tu kebuah kitai nerima penatai mayuh mensia ditu malam tu,” ku iya.
Taja rega utai tanam dagang besai labuh, kelebih agi lada, tang enda entu mangka raban belada ditu, ku Rolland, ti ngelanggur penemu ngambika sida ngemayuhka bansa utai tanam.
Iya mega ngelalau sida nyikap diri ngena penerang enggau penemu komunikasyen ngambika sida ulih ngaul diri chakah ba e-dagang tauka ekonomi digital.
Kelai sukung ngagai Pesta Pakan taun tu, Rolland ngagihka belanja penyampau RM20,000 sereta mega meri tabi puji ngagai Sarakup Indu Dayak Sarawak (SIDS) Pampang Pakan ti udah bejalaika pengawa chukup manah ngemujurka atur pengerami semilan hari berunggu, berengkah ari 18 Ogos nyin tadi.
Seraya, batang pengerami iya nya pekit Kumang Pesta Pakan ti matak semilan iku pesereta ari selampur Bagi Menua Sarikei.
Gelar Kumang dipenggi Terina Roza, 20 ari Julau; Imau Tedong (lumur dua) enggau Syafiqah Empul, 20 (lumur tiga).
Tumu pagi sehari nya, Rolland bisi dikangau ngelepaska konvoi Rentap memorial Tomb ba Bukit Sibau semak ditu.
Konvoi datai ari 40 entukar 4WD enggau 20 motosikal besai udah nya nampung pejalai ngelawa Ulu Skrang, ke alai sida diau bemalam sebedau mulaika diri pagi sitin (Hari Minggu).
Antara bala bisi datai, bini Rolland, Sapit Residen Sarikei, Abang Mohd Porkan Abang Budiman, Pemesai Pelilih Pakan, Seruji Ludin, Ketuai Polis Pelilih Julau, DSP Bidol Noyeng, Pe- mancha Tekong Ranggie, bala ketuai mayuh beng- kah opis sereta bala ketuai komuniti.