Heart of Borneo ngangkatka Ulu Menyang nengah konsep ‘Ekonomi Hijau’
KUCHING: Inisiatif ‘trilateral’ Heart of Borneo (HoB) entara tiga perintah menua iya nya Malaysia, Brunei enggau Indonesia ngangkatka Projek Ekonomi Hijau-Teh Gaharu di Ulu Menyang, Batang Ai.
Projek pemungkal ba tanah pemesai 43,000 hektar nya udah mujur nanam 11,000 pun gaharu ba taun 2017.
Nengah saup Opis Kampung Sarawak (JHS) enggau WWF Malaysia, projek diatu benung dikereja peranak Rh Manggat Meringai.
Engka jarang didinga, gaharu ke dikelala ketegal batang kayu di bau rengut, diatu ditanam ketegal deka ngulihka daun ke tau diproses nyadi teh gaharu.
Projek Menijar Inisiatif Gaya Hari Antarabangsa (IKI) Sarawak, Cynthia Chin madah projek dikearap ulih ngintu pemaik kampung tropika ba kandang endur nya.
“Kelimpah ngenan pemanah gaya hari, projek mega nempa kampung ti chukup engkeman ba pengidup Orang Utan.
“Projek mega ngangkatka ekonomi peranak Ulu Menyang nengah konsep ekonomi gadung,” ku Cynthia bejaku ngagai pengarang berita be penemuai kereja ke Rh Manggat, Ulu Menyang kena 22 enggau 23 Ogos 2018.
Penemuai nya disempulang raban WWF Indonesia enggau sekeda ketuai perintah Indonesia di Kalimantan Barat nyengkaum raban pemesai ari JHS.
Ngenang kaul ke sama, Cynthia madah pekara ke berat dalam projek tu lalu kebuah pun gaharu dipilih ketegal pemerat ngintu pemaik jelu siga kelebih agi Orang Utan.
Rikod JHS ku Cynthia mandangka bisi urung 100 iku Orang Utan nguan kampung di Ulu Menyang.
“Kededua JHS enggau WWF mantu pengawa nanam gaharu di Ulu Menyang ke alai 11,000 paung pun ditanam di tanah pemesai 43,000 hektar.
“Pengawa nanam pun tu diadu bererenggat lalu dikereja peranak Rh Manggat. Raban volunteer ari universiti enggau ejensi perintah bisi mega mantu,” ku iya.
Cynthia madah, pun gaharu ke udah besai enda ditebang lalu semina ngulihka daun aja.
Ku iya, peranak Rh Manggat ulih ngetau asil daun gaharu dalam timpuh 3 taun ke alai daun nya deka diproses lalu digaga nyadi teh.
Pengudah pun nya besai jemah, 43,000 tanah nya deka nambah kampung ti deka besambung enggau kampung asal Orang Utan di Ulu Menyang, tandu Cynthia.
Tr Manggat lebuh dikerandau madah sida sekayu rumah sigi nyukung projek nanam pun gaharu lalu nambahka nya tanah sida sigi kena bungkur kandang endur konservasyen.
“Tu siti projek ke manah lalu kami sekayu rumah panjai meri kerejasama ngagai WWF sereta JHS ba pengawa ngemujur projek.
“Kitai pechaya projek ulih nyaup ngangkatka pemisi belanja kami serumah,” ku iya.
Nitihka pansik JHS (Suliman Jamahari enggau Dr Lim Chan Koon ari Aquilaria Plantation Sarawak Sdn Bhd), rega makit daun gaharu diatu manggai RM6 sekilogram ke alai seekar tanah ulih endur nanam 800 pun gaharu.
Pansik nya mega netapka urung 200- 300 kg daun gaharu ulih dipansut dalam kandang seekar lalu daun nya diambi tiga kali setaun.
HoB mungkur tanah peme- sai 22 juta hektar ke berengkah ari tengah Sarawak nyentuk tunga ke utara Kalimantan Barat.
Projek nanam gaharu digaga enggau tuju ngerembaika konsep ekonomi gadung ti ngemansutka asil kampung lalu enda ngeruga pemaik rampa menua.