Penatai Anwar di Sibu kena 8 Sept deka disambut enggau penuh basa

SIBU: Sitak Sibu nyadi mengeri keterubah ba nengeri tu dipilih Ketuai Umum Parti Keadilan Rakyat ( PKR) Datuk Seri Anwar Ibrahim nemuai kena 8 September ti deka datai.

Sekretari PKR Kanowit George Chen madah, penatai Anwar belabuh ari Padang Bilun Sibu nyentuk ngulu pengerami makai lemai ba Kingwood Hotel ila deka disambut enggau penuhbasa.

“Dikena mandangka sukung ngagai penatai iya, semua ketuai pati parti PKR enggau raban pati parti iya nya bisi 29 iti serata nengeri tu deka datai ngulu pengerami tu ila.

“Pia mega kitai bela nesau mensia mayuh ke bukai nyengkaum ketuai raban bansa bela ngulu pengerami tu begulai enggau Anwar ti deka diangkat nyadi Menteri Besai kitai nangkan ke tu ila,” pia ku iya madah maya aum media ditu, kemari.

George ti mega Chairman Komiti Pengerami bela madahka pengerami tu dikemujur PKR Zon Tengah iya ke dikeringka 11 iku ketuai pati parti PKR ari Tanjung Manis, Mukah, Sibu, Lanang, Kanowit, Selangau, Julau, Sarikei, Ulu Rejang enggau Kapit.

“Kami ngarap, sepengudah perintah betukar kitai bisi perintah ke manah agi.

“Pengerami tu nyadika singkang keterubah napi Pengawa Bepilih Nengeri ti deka datai lalu andal ulih ngalahka GPS sereta megai nengeri nangkan ke tu ila,” ku iya madah baru.

Nambahka nya, ku George, parti sida besai amat pengandal ngagai mensia mayuh ulih bela datai mandangka sukung ngagai pengerami nya.

Mensia mayuh ke bisi ati deka datai ngerichah agi pengerami tu tau bebelika mija enggau rega RM1,000, RM800 enggau RM500.

Tikit mija tau dibeli ari Abdul Rafidin ( Sibu0168670078), Law Hin Ching (Lanang-0198866132), Umie Liau ( Ulu Rajang0128806276),Thomas Laja ( Kanowit- 01155044588), Wong Chin Tung (Sarikei01110578228), Abdul Jalil ( Mukah- 0198852055), Kevin Kilo Lutan (Bintulu0193325538), Samana Sawang (Julau-0195659294) enggau George Chen (0198873515).