Lebih 10 buah rumah panjai napi penanggul nya lalu diatu mengkang nadai karan sereta ngandalka ai timbun ari bukit
SIBU: Semina asa meda Tekat Ai Bakun tang lebih 10 rumah panjai ari baruh tekat nya naka ke diatu empai disambung karan enggau ai beresi.
Rumah panjai tu iya nya Punan Biau, Punan Sama, Sekapan Panjai enggau Pandak, Kejaman Meh enggau Lasa, Tanjung, Rumah Apan, Uma Nyaving, Uma Lahanan, Long Mitik kelimpah beberapa buah rumah panjai Iban ke bukai.
Ketuai Parti Keadilan Rakyat (PKR) Ulu Rajang Umie Liau madah, taja diau semak enggau Tekat Ai Bakun, kelimpah ke nadai disambung karan nyentuk ke diatu bala dia mengkang ngandalka ai timbun ari bukit.
“Ukai semina enda diubat bisi maya mega ai dia enda chukup dikena mensia mayuh dia lebih agi maya Hari Krimas.
“Ai ke bisi enda chukup dikena baikka dikena mandi laban ngenyadika dikena pengawa bukai baka manduk pemakai,” pia ku iya ngarika rayatka menua nya madah maya aum media ba Opis PKR Lanang ditu, kemari.
Umie madah, ketegal pekara nya bisi sekeda ke gawa di mengeri berunding dua kali enti deka mulai kediri ke menua.
Kelimpah ari rumah panjai nya, iya madah, ba Skim Pengentap Pendiau Tekat Ai Bakun-Sungai Koyan, lebih 30,000 iku rayat dia mengkang napi penanggul ai enda chukup tauka enda laju.
Ku iya, ukai semina nya aja ai mega suah bendar keruh, bau sereta kelalu mayuh klorin.
Ai ke bisi enda chukup dikena baikka dikena mandi laban ngenyadika dikena pengawa bukai baka manduk pemakai. Umie Liau Ketuai PKR Ulu Rajang
“Penyampau tubuh rayat dia majak nambah ari taun 1998 iya nya taun maya dipindah ngagai skim nya.
“Penanggul ai tu balat bendar ngenusahka bala dia,” ku iya nambah baru.
Ba penanggul bukai, Umie madah, perintah nengeri datai nganjung semaya ngagai rayat dia madahka deka nambahka pemansang baka projek jalai belankin ungkup Sungai Asap.
“Tang taja pia semaya nya empai dipeda kelimpah nyentuk ke diatu kami mengkang ngandalka jalai Projek Jiwa Murni.
“Kami ngelar jalai tu jalai ‘Projek Jiwa Merana’ laban ti enda likun ditengah sereta enda dibelankin tauka agi jalai tanah,” pia ku iya nerang.
Iya madah, empai lama Kepala Menteri Datuk Patinggi Abang Johari Tun Openg bisi datai kia besemaya meri bejuta ringgit dikena ngaduka infrastruktur nyengkaum jalai belankin tang agi kediatu sida empai meda projek nya belabuh.
“Kitai ngarapka perintah nengeri beratika pekara tu enggau lengkas ukai semaya digaga nyadi balang.
“Ketegal nya mega, kitai andal amat Pakatan Harapan (PH) ulih menang ba Pengawa Bepilih Nengeri (PRN) ti deka datai ngambika ulih mutarka penanggul rayat ditu,” ku iya madah sereta andal.