Fadillah: Semengat talukka menua patut diterenak ba genap komuniti
KUCHING: Semengat talukka menua patut diterenak ba genap iku komuniti dikena napi bemacham pemar nyengkaum pemisi media rama kemaya hari.
Kaban Parlimen (MP) Petra Jaya, Datuk Seri Fadillah Yusof madah, kebuah pia, bekenaka media rama nadai sekat diperati nyadi siti pekara ti tau ngeruga pengelantang enggau penyerakup raban bansa.
“Bisi pekara bula, enda betul enggau berita pelesu dikerembai nengah meida rama ari raban nadai tanggungpengawa.
“Nya alai kitai patut begem- pung nyekat sebarang pekara enda manah dibai media rama nengah bemacham chara. Siti ari nya, ngatur Kimpin Ngitang Jalur Gemilang baka sehari tu (ensana),” ku iya.
Iya mansutka jaku nya lebuh bejaku ba pengawa bejadika Kimpin Ngitang Jalur Gemilang ba Balai Sri Kandis, Kampung Siol Kandis ditu, ensana.
Nengah pengawa baka tu, Fadillah andal pengelantang enggau semengat talukka menua ngagai bala komuniti ulih ditan sereta diasaika rebak dudi.
Nitih ku iya, program tu ukai semina negutka tanggam kaul penyerakup enggau kaul kerejasama komuniti aja, tang mega ulih meransang semengat talukka ngagai menua peranak menua tu.
“Dikearap pengawa tu (ngatur Kimpin Ngitang Jalur Gemilang) seruran dipejalai lalu sampi ngambika nengeri enggau menua kitai seruran diau likun, lantang, meruan sereta bebaik.
“Tu siti ari chara dikena kitai ngemai bala anak kelebih agi rebak biak ngerami hari meredeka lalu nerenakka semengat talukka menua ngagai sida,” ku iya.
Diatur Komiti Pemansange enggau Pengelikun Genturung Pendiau (JKKK) Kampung Melayu enggau Kawasan Rukun Tetangga (KRT) Kampung Siol Kandis, bemacham aktiviti baka senamrobik, pekit ngelagu rumah ngena tambai, pekit ngelinsu enggau mayuh ke bukai bela diatur dikena ngerichahka program nya.
Berebak enggau program nya, Fadillah mega nerima siti dokumen iya nya ripot pasal Kampung Siol Kandis ari Penghulu genturung pendiau nya, Amin Abdullah.