Perintah nengeri meri RM1 juta dikena mantu ngaga blok begunan baru SJK (C) Kiew Nang
KUCHING: Nengah penembu dua blok begunan baru dalam timpuh dua taun ke deka datai, SJK (C) Kiew Nang dipelabaka ulih nangkup peminta penyampau nembiak ti majak nambah deka besekula ba sekula nya.
Chairman Lembaga Pengurusan SJK (C) Kiew Nang, Tiong Hock Kieng madahka diatu sekula nya bisi urung 400 iku nembiak sereta bisi 13 buah kelas.
“Projek renggat keterubah ngaga blok begunan baru sekula tu deka bisi dua blok sereta tetiap blok bisi empat ringkat sereta deka nyendiaka 32 buah kelas. Timpuh tembu ngaga semua tu urung dua taun.
“Ungkus belanja dikena bejalaika projek tu urung RM5 juta lebih laban nya nyengkaum infrastruktur.
“Diatu mayuh amat kandang berumah baru ditumbuhka kelimpah ari sida ti bepindah ari endur bukai ke Sibu, nya alai tiap taun penyampau nembiak baru nambah, nya kebuah kami begunaka begunan baru,” ku iya.
Tiong mansutka pekara nya lebuh dikerandau raban pengarang berita pengudah ti nerima chek RM1 juta ari perintah nengeri ti disuaka Kepala Menteri Datuk Patinggi Abang Johari Tun Openg dikena mantu bejalaika projek nya, ti beungkus urung RM10 juta.
Pengawa nerima chek nya diatur ba Opis Kepala Menteri di DUN ditu, lemai kemari.
Nitih ku iya, ke bendar projek ngaga bangunan baru sekula nya bisi tiga blok ti nyendiaka 48 kelas, taja pia dibagi ngagai dua renggat.
“Renggat kedua deka berengkah dipejalaika enti dua blok ba renggat keterubah udah tembu,” ku iya seraya madahka begunan baru nya deka disikap enggau bilik pengajar, bilik baum, bilik komputer, sereta librari.