Opis baru STB dibuka ba Plaza Aurora
KUCHING: Opis menteri Dagang temuai, Seni, Main Asal, Nembiak enggau Lumba enggau Main (KPKKBS) deka mantu ngenukuka Plaza Aurora nyadi ‘ One Stop Centre’ dagang temuai di mengeri tu.
Menteri iya, Datuk Abdul Karim Rahman Hamzah madahka enggau penumbuh opis Lembaga pelancongan Sarawak ( STB), Biro Konvensyen Sarawak (SBC) enggau Grab di baruh siti perabung, Plaza Aurora ulih nyadi ‘ One Stop Centre’ dagang temuai di sarawak jemah ila.
“Aku arap bendar palan tu setipak endur STB enggau SCB laban sida patut nempa kerejasama rat dalam pengawa ngelakuka dagang temuai enggau nyendiaka kereban ke dikena awakka ulih ngenyakahka agi industri.
“Opis menteri deka meri sukung sereta bantu dikena nyadika Plaza Aurora ti dulu suba Kuching Plaza nyadi ‘One Stop Centre’ dagang temuai ditu lalu berebak enggu tu aku ngarapka pengemeran industri mega deka muka opis sida ditu,” ku iya.
Iya mansutka pekara nya lebuh bejaku ba pengerami bejadika opis baru STB ba Ringkat 4, Plaza Aurora, Jalai McDougall ditu kemari.
“Aku ngarapka enggau premis baru tu STB deka terus komited sereta nyulut ngelakuka sektor dagang temuai Sarawak.
“Meri pengaga ati, ketegal pemendar gawa, pengujung iya STB bisi ruang opis ti lebih ‘vibrant’ sereta amat ngayanka mayuh macham chura, main asal enggau etnik ba Sarawak,” ku iya.
Kelimpah ari nya, Pemangku Ketua Pegawai Eksekutif (CEO) STB, Mary Wan Mering lebuh bejaku ba pengerami nya madahka opis baru nya bisi konsep tebuka sereta reka bentuk kontemporari moden dikena ngemuntangka kereja sereta ngangkatka penyikar pengereja pengawa.
Bejaku baru iya madahak konsep tebuka nya mega meri awak ngagai pengereja pengawa STB enggau pengemeran industri ngatur randau enggau lantang agi.
“Kitai pindah ke Plaza Aurora pengudah pengelama 16 taun beoperasyen ba Bangunan yayasan Sarawak di Jalai Masjid. Sebedau tu kitai muka opis enda lama di Wisma Satok.
“Kitai pechaya Plaza Aurora, palan pemadu manah sereta mudah dilawa pengemeran industri, orang ke bekaul enggau ke pemadu beguna temuai,” ku iya.
Sama bisi datai Menteri Muda Dagang Temuai, Seni enggau Main Asal Datuk Lee Kim Shin, Menteri Muda Nembiak enggau Lumba enggau Main Datuk Snowdan Lawan, Sekretari Mendam KPKKBS, Hii Chang Kee enggau Chairman STB, Datuk Abdul Wahab Aziz.