Ngambika bisi endur nempa mayuh agi orang dagang biak di mengeri nya enggau ke ngelingi
KUCHING: Sibu deka nyadi sebuah palan penumbuh tauka pemansang kelebih agi enti hab orang dagang udah tembu ila.
Presiden Balai Dagang enggau Industri China Sibu (SCCCI), Dr. Hii Sui Cheng, madahka hab orang dagang nya ditubuhka dikena nempa mayuh agi orang dagang biak ba mengeri nya sereta ke ngelingi.
“Kitai (SCCCI) amat beterima kasih ngagai perintah nengeri laban ti udah ngemendar numbuhka hab orang dagang biak tu.
“Enti hab orang dagang tu udah tembu digaga, deka nyendiaka mayuh kereban dikena nyukung nempa orang dagang ke ulih nyulut tauka mujur.
“Tengah menua Sarawak tauka kandang menua Sibu sereta ke ngelingi deka nyadi palan penumbuh tauka pemansang di nengeri tu, ti sama nyaup pemansang ekonomi,” ku iya.
Hii mansutka pekara nya lebuh dikerandau raban pengarang berita nyerumba ke nerima chek RM1 juta ari perintah nengeri ti disuaka Kepala Menteri Datuk Patinggi Abang Johari Tun Openg ba Opis Kepala Menteri di DUN ditu, lemai kemari.
Bejaku baru iya madahka, hab orang dagang nya mega deka meri peransang ngagai orang dagang mit enggau jelan pemesai nyadi orang dagang besai.
Ku iya, orang dagang biak diperansang nganjung keretas perambu dagang , baka ni deka deka ngepunka dagang.
Nitih ku iya, hab nya begunaka ungkus belanja urung RM1 juta, lalu dikearapka pengawa ngemanahka baru SCCCI ke udah bisi nya ba Renggat keterubah ulih tembu dalam timpuh tiga bulan.
Sebedau tu di Sibu, SCCCI madahka hab orang dagang biak nya meri peluang ngelala mayuh orang dagang dalam mayuh bidang, nyengkaum belajarka chara ngepunka dagang kelimpah ari SCCCI nyendiaka kereban.
“Sebedau tu di Sibu Kepala Menteri dalam bulan Mei besemaya deka ngungkupka RM1 juta. Sehari tu kitai amat beterima kasih,” ku iya.
Sama bisi datai ngagai pengawa nerima chek nya kemari, Sekretari Besai SCCCI Wong Ei Sing sereta kaban ke bukai.
Kitai (SCCCI) amat beterima kasih ngagai perintah nengeri laban ti udah ngemendar numbuhka hab orang dagang biak tu. Dr. Hii Sui Cheng Presiden Balai Dagang enggau Industri China Sibu