Komuniti menua pesisir diperansang besaup enggau GPS negika hak MA63
MARUDI: Menteri Muda Kaunsil Kandang Menua Datu Dr Penguang Manggil dekaka komuniti menua pesisir begempung agi sereta bekerejasama enggau Gabungan Parti Sarawak (GPS) ke megai perintah nengeri ba pengawa sida nyaga hak nengeri di baruh Sempekat Malaysia 1963 (MA63).
Ba pekara tu, ku Kaban Kunsil Nengeri ( ADUN) Marudi, komuniti menua pesisir mega meseti seruran nyaup pangan diri ba juluk besai ngubah Sarawak nyadi nengeri ti mansang.
“Komuniti menua pesisir meseti seruran begempung enggau bekerejasama ba pengawa negika hak peranak Sarawak laban nadai orang bukai ulih ngereja pengawa ngelui ari peranak Sarawak empu.
“Aram bela begempung ngemansangka nengeri kitai enggau nyaga hak kitai belalauka MA63,” ku Dr Penguang ba jaku dipansutka iya lebuh bejadika randau senentang gaya politik ke diatu enggau tanah NCR begulai enggau bala ketuai komuniti ba Balai Komuniti Beluru di Bakong, apin lama ke udah.
Antara hak nengeri ti udah lenyau ngelama tu nyengkaum Akta Pemansang Petroleum (PDA) 1974 meri hak minyak enggau gis nengeri ngagai Petronas lalu ngujungka nengeri tu semina nerima lima peratus aja royalti minyak, ku Dr Penguang.
Kelimpah ari nya, Akta Garis Antara Tasik 2012 mega ngurangka bungkur kandang tasik nengeri ari 12 ngagai 13 batu nautika, ku iya.
“Ubah ba Konstitusyen Perintah Besai kena 27 Ogos 1976 dikena ngubah status Sarawak enggau Sabah nyadi nengeri ke-12 enggau ke-13 dalam Federasyen Malaya, nya alai limpang ari tuju asal pengawa numbuhka Federasyen ari Tiga Menua ngagai Gempung 13 Nengeri ke alai semua kuasa enggau kuasa diempu nengali Perintah Besai,” ku iya nambah.
Nya kebuah, pengawa numbuhka GPS nyadi pengawa pemadu engkeman dikena nentuka kuing pejalai Sarawak dudi hari, ku iya.
“GPS nyadi pelasar pemadu manah ngagai peranak Sarawak begempung, enggau nadai menggi tanggung- pengawa ngagai menyadi tuai kitai ba Semenanjung Malaysia, ba pengawa negika hak Sarawak dalam konteks MA63, Riport Komiti entara- Perintah (IGCR )enggau Konstitusyen Malaysia.
Dr Penguang madahka GPS, datai ari parti ari Sarawak ti nyengkaum Parti Pesaka Bumiputera Bersatu (PBB), Parti Rakyat Sarawak (PRS), Parti Sa’Ati Rayat Sarawak ( SUPP) enggau Parti Tindakan Progresif (PDP), lalu diketuaika Kepala Menteri Datuk Patinggi Abang Johari Tun Openg ti seruran berundingka pemin- ta pemadu manah Sarawak enggau peranak iya.
“GPS nyadi penepan pemadu engkeman ngagai kitai peranak Sarawak dikena nempa langkar enggau nasit kitai dudi hari enggau nadai penanggi sereta bechiping.
“Perintah nengeri seruran beratka landskap politik enggau peminta sereta peneka peranak Sarawak laban semina peranak Sarawak aja nemu nama pekara dikedeka sida,” ku iya nambah.
Randau nya udah digulu lebih ari 800 iku nyengkaum sida ari sitak menua bukai di Bagi Menua Miri.
Tuju iya dikena nyediaka pelasar ngagai peranak enggau bala ketuai komuniti mantaika langgur penemu enggau pengirau sida, kelebih agi senentang tanah NCR enggau gaya politik kemaya hari ba nengeri tu.
Iya mega nyediaka pelasar dikena nerang enggau madah penerang Rang Undang-Undang Kanun Tanah (Ubah) 2018, lalu nerima timbal ari rayat.
Sama bisi datai Sekretari Politik Kepala Menteri Alexander Asing Sadai enggau Pemangku Pemesai Pelilih Beluru SAO Marliney Igil.