Norina udah ngatur program jaku tesau ubah kuing politik ba Rumah Jumat
KUCHING: Penyelaras Parti Keadilan Rakyat ( PKR) Sri Aman, Norina Umoi Utot mujur ngatur program mai jaku tesau ubah ngagai Rumah Jumat, Kampung Po Ai, Sri Aman, apin lama ke udah.
Pejalai Norina mega disempulang Mandal Chairman Parti Tindakan Demokratik ( DAP) Nengeri, Leon Jimat Donald sereta bala kaban parti bukai.
“Pejalai kami sehari tu mai ati ransing ngubah runding enggau kuing politik ba pekara pemansang rayat ba menua tu.
“Kami sebuat mega berasai gagit meda timbal diterima ari peranak menua tu, kelebih agi bala kaban ari Parti Rakyat Sarawak ( PRS) ti udah ngenukuka diri pansut ari parti nya lalu nyemilik parti kitai, PKR,” ku Norina.
Pengawa ningkilka diri ari PRS Po Ai diketuaika Kichin Akin begulai enggau peranak ari tiga buah rumah panjai bukai, iya nya ari Rumah Jumat, Rumah Wilson Bana enggau Rumah Bunan.
Nangkan nya ku Norina, pemutus urung 80 iku kaban PRS nya ketegal sida lenyau pengandal ngagai bala ketuai tetinggi enggau presiden parti sida, Tan Sri Dr James Jemut Masing.
Bala sida tu mega ku Norina, asa meda ulah bala ketuai PRS nadai ngembuan ati lurus lebuh ngempung enggau gawaka rayat.
“Tu ubah besai, pemutus chukup berani ti ngubah kuing pejalai enggau tuju politik sida ngagai parti ti megai perintah baru menua. Aku endang temegah ati nerima juluk sida tu nyemilik kitai PKR.
“Kitai ngarapka sida tu deka nyaup ngenegapka penuduk PKR ba men- ua Simanggang kelimpah ngerembaika berita parti ti megai menua renggat perintah besai ngagai peranak bukai,” ku Norina.
Berebak enggau nya, Kichin Akin udah dipadu nyadi Ketuai Ranting PKR Po Ai rambau Pengawa Bejadika Ranting enggau Pengawa Nyuaka Pom Nyadi Kaban PKR P202 Sri Aman ba Rumah Jumat, apin lama ke udah.
Norina mega bisi limpang nyuaka pemeri set pensel ari Projek Pensel ti dipungkal iya kenyau ari taun 2016 ngagai bala nembiak sekula ba rumah panjai nya.