Projek jalai ‘missing link’ di utara Sarawak deka terus dipejalai KKR

MIRI: Jalai ‘ missing link’ tauka jalai ti mengkang ‘putus’ adap Utara nengeri tu, jalai ti nyambung Miri ngagai Limbang enggau Lawas deka terus digaga Opis Menteri Kereja Raya (KKR) nentuka juluk nya nyadi nyata.

Pengawa ngaga jalai alternatif nya ila deka nyambung ketetiga mengeri adap utara nengeri tu nengah pasar Long Lama, Marudi enggau tanah tinggi Bario enggau enda ibuh mansa menua Brunei.

Menteri Kereja Raya, Baru Bian lebuh ngulu Projek ‘Lawas My Home’ nyerumba Karnival Belia Lun Bawang di Dataran Bandar Lawas, apin lama ke udah madahka iya sedar amat penanggul baka pengawa bekanaka passport, mar mai barang pemakai baka berau enggau ke bukai ditapi peranak Limbang, Lawas enggau Miri ti mansa Brunei.

Iya ngarao ari pemisi jalai alternatif tu ila deka mutarka penanggul nya.

“Kitai sedarka pemar ditapi tang Opis Menteri Kereja Raya deka nampung pengawa ngagai jalai ‘missing link’ tu, ti ukai semina ngemuntangka rayat enda ibuh mansa menua Brunei enggau napi bemacham atur terit enggau ke bukai.

“Pekara tu udah dipesetuju Menteri Besai, Tun Dr Ma- hathir Mohamad rambau penerang begulai enggau KKR Malaysia, apin lama ke udah,” ku iya nambah.

Ba lansa bukai, Baru mega beratika peminta perintah nengeri ngaga siti agi jalai iya nya ‘trunk road’ kedua di nengeri tu, nyadi pekara ti enda patut.

Tang perintah nengeri patut beratika peminta bukai ti meri pemaik agi ngagai rayat baka ngaga enggau ngemanahka jalai genturung pendiau, jalai ngelawa rumah panjai sereta pengentap pendiau peranak di menua ulu nengeri tu.

“Kitai beratika nengeri tu udah bisi jalai besai Pan Borneo enggau jalai tebing tasik ti udah nyambung kandang menua adap Selatan nyentuk Utara Sarawak.

“Nya kebuah, patut agi perintah nengeri beratika pekara bukai ti beguna agi dikena ngemansangka kandang menua ulu Sarawak ngena agih belanja tu enti dibida pengawa ngaga jalai alun kedua tu,” ku iya.

Ngelansa pasal isu nembiak di Lawas, Baru Bian beratika pematut raban bekuasa ari mayuh bengkah ejensi penerit adat bejalaika pangku pengawa terit agi, ngemanahka nama menua Lawas ari ulah negetif kelebih agi salah guna dadah enggau gian dadah.

“Kitai deka berandau baru enggau bala komuniti di Lawas ngambi beratika pengawa raban bekaul ba pengawa mutarka penanggul dadah ba Lawas.

“Berebak enggau nya, kitai dekaka semua komuniti bela ngaul diri dikena nentuka Lawas nadai dikeruga dadah ti diperati balat ngirauka ati kandang diatu,” ku iya.

Baru Bian ke mega Kaban Kunsil Nengeri ( ADUN) Ba’kelalan enggau Kaban Parlimen (MP) Selangau beratika serius isu dadah enggau judi siber di pelilih Lawas enggau nengeri Sarawak.

Dulu ari nya, ba jaku dipansutka iya, Baru nyemetak madahka raban nembiak nyadi keresa pemadu berega menua ti patut diembing sereta dilatih ngena bemacham pengelandik setipak enggau penau dikembuan sida.

Nya alai program baka karnival nembiak tu patut nyadi pelasar dikena nyidi penau raban nembiak ngambika ulih dikemansang ngagai renggat tinggi agi.

Berebak enggau program nya, Baru mega bisi ngemendarka geran perintah penyampau RM20,000 ungkup PLBS Pampang Nembiak Lawas.