SWP setuju perambu deka ngurangka penyampau BR1M sebedau diketuka terus
SIBU: Sarawak Workers Party (SWP) besetujuka penemu Menteri Besai Tun Dr Mahathir Mohammad ti deka ngurangka penyampau Bantu Rayat 1Malaysia ( BR1M) sebedau bantu nya dikemaduka terus.
SWP ti diari sapit presiden sida Capt (R) Engga Unchat madah, BR1M ukai siti sistem ti manah dikena nyaup ngelempungka pengidup rayat lebih agi ngagai raban ruang bilik ti bepenatai pemisi 40 peratus pemadu baruh (B40).
“Kitai enda ulih meri sida ikan tang manah agi meri sida ginti.
“Chunto ke pemadu manah iya nya maya kitai agi mit indai deka nyandik kitai tang maya kitai mansang besai dia kitai belubah-lubah bejalai kediri.
“Tu patut dirunding baka raban B40. Anang kelalu bepanggai ba bantu ari orang enti enggai tinggal ke belakang,” pia ku iya madah nengah penerang media, kemari.
Mahathir sebedau tu diripotka deka ngurangka penyampau BR1M enggau chara berenggat sebedau dikemaduka.
Ba penemu Menteri Besai ketujuh nya madahka chara tu deka nentuka rayat ulih ngidupka diri tang ukai bepanggai pengidup ari tulung perintah aja.
Nambahka jaku iya, Engga madah, nyangka bantu nya patut diketu dalam kandang tiga ngagai lima taun agi ari diatu.
Tang ku iya, enti pemutus nya udah digaga, perintah pegai Pakatan Harapan ( PH) meseti numbuhka chara enggau inisiatif ke baru dikena nyilih BR1M.
“Pengawa ke dikereja nadai mai reti enti semina ulih ngubah dunya tang enda ulih ngubah pengidup rayat,” ku iya madah baru.