Deka diari semua ketuai komuniti nyengkaum bala pemancha, penghulu nyengkaum ti pegari nama ari sitak nya
MARUDI: Komiti Khas gawa beratika pekara bekaul enggau tanah Adat Bansa Asal (NCR) ba Marudi deka ditumbuh.
Kaban Kunsil Nengeri Marudi Datu Dr Penguang Manggil madahka komiti deka diari semua ketuai komuniti nyengkaum bala pemancha enggau penghulu sereta mega beberapa orang ti pegari nama ari sitak nya.
“Komiti tanah NCR deka ditumbuh ba Marudi enda lama agi.
“Tuju nya deka ngempung penerang ari peranak ngambika kami ulih mutarka isu tanah ngelingi kitai ditu,” ku iya.
Dr Penguang mansutka pekara tu ba jaku dipansutka iya rambau randau senentang gaya politik kemaya hari tu enggau tanah NCR begulai enggau bala ketuai komuniti ba Balai Komuniti Beluru di Bakong, apin lama ke udah.
Antara tuju randau ti udah ngempuru lebih ari 800 iku peranak nyengkaum sida ari sitak bukai di Bagi Menu Miri, nerang silik pasal semua pekara enda arap bepelasarka Rang Undang-Undang Kanun Tanah (Ubah) 2018, ti udah nerima mayuh perati ari mayuh bengkah media rama bedau lama ke udah.
Randau mega dikena nyendiaka pelasar ngagai peranak enggau bala ketuai komuniti mantaika langgur penemu sereta pekara dikemeratka sida, kelebih agi ba pekara bekaul enggau tanah NCR sereta gaya politik kemaya hari ba nengeri tu.
Dr Penguang madah bisi dua batang pekara ke beguna amat ba tanah NCR ti patut ditemu peranak menua pesisir.
“Keterubah, tanah NCR, nyengkaum Pemakai Menua enggau Pulau Galau (PMPG) selampur nengeri diatu udah diberi kuasa undang-undang di Sarawak.
“Kedua, sida tau nganjung peminta tauka minta PM enggau PG ngagai Opis Tanah enggau Survei nyentuk ke maksimum 1,000 hektar pemesai. Tu ngelui lalu lebih ari tanah NCR sida, pala tanah, kampung galau tauka rizab kampung. Tu enda nyengkaum, ke ngelui enggau tinggi agi,” ku iya madah nyemetak.
“PM enggau PG pengudah disukat deka diberi hak ngempu ukai hak usufrukturi, lalu deka dikeluarka pala tanah, enda kena bungkur sebarang premium sereta mendam,” ku iya nambah.
Dr Penguang madahka sepenyampau 870,000 hektar tanah NCR di Sarawak udah disukat kelingi naka bulan Ogos taun tu lalu semua tanah nya udah digazet.
Berebak enggau program nya, Dr Penguang mega ngelalau peranak ba kandang menua pesisir enda mudah mendingka tuduh pelesu tauka jaku selebubu ngapa kelebih agi ba isu bekaul enggau Rang Undang-Undang Kanun Tanah (Ubah) 2018, ti udah dikemendar ba Aum Kunsil Nengeri (DUN) bulan Julai tu tadi.
Ku iya, tu beguna amat ngagai peranak menua pesisir ngambika ngakim sereta beratika pekara ti dibacha tauka dipeda sida ba media rama, sereta mega penerang ti enda patut ari sekeda raban, ngena pemintar runding.
“Anang pechayaka sebarang pekara ti bisi dibantai ba mayuh bengkah pelasar media rama sereta mega berita ngerimbas pending tauka cherita ditabur mensia mayuh sebelah kaki lima enggau sepeneka nyebut.
“Pekara ke pemadu manah iya nya minta penerang silik ari bala pengari rayat kitai, ngambika nerang nama pengawa ti udah digaga kelebih agi ba ubah Kanun Tanah ti endang meri pemaik ngagai rayat,” ku iya ngelalau.
Tuju nya deka ngempung penerang ari peranak ngambika kami ulih mutarka isu tanah ngelingi kitai ditu. Datu Dr Penguang Manggil Kaban Kunsil Nengeri Marudi