Jamit minta URDA ngagai jalai ngagai rumah panjai sepanjai Sungai Belawai
KAPIT: Kaban Kunsil Nengeri ( ADUN) Goram Jefferson Jamit Unyat lebuh ke nemuai ngagai rumah panjai sepanjai Sungai Belawai minta raban Opis Bekuasa Ngemansang Ulu Rajang ( URDA) ngaga jalai nyambung lebih ari 10 buah rumah panjai ari Nanga Belawai ngelawa Rumah Jabang di ulu Sungai Belawai.
“Aku minta raban URDA ngaga jalai ti nyambung semua rumah panmjai ari Nanga Belawai ngagai Rumah Jabang, Ulu Belawai ditu. Diatu, pejalai nengah Sungai Belawai. Maya musim kemarau, ai mabu, nadai nanggul enti mindah ngena perau mit, tang ai ti mabu ngujungka peranak menua nya bebatak.
“Enti bisi jalai digaga, tu deka ngemuntangka pejalai sida sereta meri peransang ngagai sida ti ngempu tanah ngemansangka tanah ungkup pengawa betanam betupi baka nanam getah enggau lada, dikena nambahka penatai pemisi, ngagai lebih ari 10 buah rumah panjai sepanjai Sungai Belawai ditu,” ku Jamit nerang lebuh bejadika Prpgram Pemesai begulai Enggau Rayat diatur ba Rumah Ringga Ejeh.
Sekretari Politik Kepala Menteri Sarawak, Tapah Ata disempulang Penghulu Pasang Tubah enggau bala kaban PBB Bukit Goram – Ambrose Abong, Watson Awan, Cocham Alwi, Alexon Nilai, Edward Manggah, Tang Bukok, sereta bala bukai kenyau ari Hari Lima kiruh ngulu atur program ngabas Sitak N63 Bukit Goram, ngatur randau enggau rayat.
Tuju bukai pejalai nya dikena Jamit meri terima kasih ngagai bala pengundi ba Pengawa Bepilih besai Ke- 14 ( GE14) ti udah meri sukung nadai bebagi ngagai chalun GPS Datuk Alexander Nanta Linggi sereta meri penerang ngagai peranak menua pesisir pasal gaya politik kemaya hari.
Ba semua pejalai enggau randau begulai enggau rayat, Jamit ngenang pemaik enggau meri terima kasihka sukung tegap semua sida ngagai Datuk Alexander Nanta Linggi maya PRU14 tu tadi.
Iya ngapil ngagai sida seruran nyukung Perintah GPS di Sarawak betuaika Kepala Menteri Datuk Amar Abang Johari, ti nyadi ketuai beratka peminta semua peranak Sarawak.
Ku iya, datai ba taun 2021, nengeri deka ngatur Pengawa Bepilih Nengeri laly iya ngapil ngagai rayat nyukung iya terus megai penuduk. Iya enggau Datuk Alexander Nanta Linggi seruran deka bekerejasama rat berandauka chara pemadu manah gawaka rayat.