Jamit udah nemuai seraya begulai enggau bala pengundi ba sitak Bukit Goram
KAPIT: Kaban Kunsil Nengeri ( ADUN) Goram Jefferson Jamit Unyat enggau Sekretari Politik Kepala Menteri Sarawak, Tapah Ata disempulang Penghulu Pasang Tubah sereta kaban PBB Bagi Menua Bukit Goram baka Ambrose Abong, Watson Awan, Cocham Alwi, Alexon Nilai, Edward Manggah, Tang Bukok enggau bala bukai kenyau ari Hari Lima nyin tadi kiruh enggau program ngabas sitak menua nya, betemu enggau bala pengundi.
Jamit meri terima kasih ngagai bala pengundi maya Pengawa Bepilih Besai Ke-14 (PRU14) ti udah mantaika sukung nadai bebagi ngagai chalun GPS, Datuk Alexander Nanta Linggi sereta meri penerang ngagai peranak menua pesisir pasal gaya politik kemaya hari.
Jamit ke lalu nyadi Direktor Bepilih kena 9 Mei 2018 ba Sitak Parlimen 215 Kapit ngarika Kaban Parlimen Kapit, Datuk Alexander Nanta Linggi.
Iya nerang pengudah PRU14, peranak menua tu ngundi chalun PH lalu ba Putrajaya diatu, Menteri Besai Tun Dr Mahatir. Taja pia, ba Sarawak, nadai berubah, perintah di baruh pegai Kepala Menteri Sarawak, Datuk Patinggi Abang Johari enggau empat komponen parti merintah baka PBB, PRS, SUPP enggau PDP diatu numbuhka perintah Gabungan Parti Sarawak (GPS) ari Sarawak.
Sida sebuat bejalai ngabas peranak rumah panjai sepanjai Sungai Belawai lalu ngatur Program Pemesai Begulai Enggau Rayat ba Rumah Ringga Ejeh ba Sungai Semujan, Belawai, ngatur randau enggau rayat.
Ba Program Pemesai Begulai Enggau Rayat ba Rumah Ringga, Jamit bisi ngemendarka geran perintah penyampau RM17,000 ngagai rumah panjai nya dikena sida ngangkatka pemanah enggau bejalaika projek infrastruktur sereta penyikap perengkaguna baka nyemin jalai enggau ngaga geraga rumah panjai.
Betrebak enggau nya, Jamit ngena awak meri penerang gaya politik kemaya hari dalam menua tu. Iya mega bekunsika penerang pasal pengawa ngerejista GPS sereta pangku pengawa 10 iku MP ari Sarawak, ari GPS.
Semua 19 iku MP GPS ari Sarawak udah diagihka belanja MRP enggau RTP ari Perintah Sarawak ngambika sida ulih bejalaika servis enggau manah ba menua dipegai sida.
Ba semua pejalai enggau randau begulai enggau rayat, Jamit ngenang pemaik enggau meri terima kasih ke sukung tegap semua sida ngagai Datuk Alexander Nanta Linggi rambau PRU14 tu tadi.
Iya ngapil ngagai sida seruran nyukung Perintah GPS di Sarawak beetuaika Kepala Menteri Datuk Amar Abang Johari, ke nyadi ketuai ti beratka peminta semua peranak Sarawak.
Ku iya, datai ba taun 2021, nengeri deka ngatur Pengawa Bepilih Nengeri lalu iya ngapil ngagai rayat nyukung iya terus megai penuduk. Iya enggau Datuk Alexander Nanta Linggi seruran deka bekerejasama lalu berandauka chara pemadu manah gawa ke rayat.
Ngenang pasal langgur pemansang ungkup Belawai, ku Jamit, “Kitai bisi ngelanggur ngagai Opis Bekuasa Ngemansang Ulu Rajang (URDA) bejalaika Mekala Elekterik Ngagai Menua Pesisir (RES) ngagai semua lebih ari 10 buah rumah panjai ari Nanga Belawai ngagai Rumah Jabang di ulu Sungai Belawai.
“Tu ulih dikereja laban ari sambung kabel karan dalam ai meraka Batang Rajang ngagai Nanga Belawai. Tuju pengawa tu dikena nambahka pemanah tikas idup. Aku enggau Nanta bekerejasama enggau ejensi perintah mai pemansang ngagai kita dikena malas sukung nadai bebagi kita ngagai kami.”