PKR Zon Tengah deka mutarka penanggul infrastruktur rayat terus ngagai KPLB
SIBU: Parti Keadilan Rakyat (PKR) Zon Tengah nengah inisiatif diri empu deka nyaup rayat di menua pesisir ngenataika penanggul pemansang infrastruktur terus ngagai Opis Menteri Pemansang Menua Pesisir enggau Komuniti (KPLB).
Sekretari PKR Kanowit George Chen madah, mensia mayuh tau ngelawa ketuai tauka raban pati parti PKR Julau, Kanowit, Selangau, Mukah enggau Tanjung Manis nyema bisi penanggul ke nyadi di menua sida.
“Taja pia kita dipinta mai gambar enggau dokumen bekaul ngambi nyadika bukti sebedau piak kitai ngenataika penanggul nya ngagai KPLB.
“Projek tu deka digaga kitai enggau lengkas laban tu chara dikena kami nyempilka agi seraka pemansang mengeri enggau menua pesisir,” pia ku iya madah.
Iya mantaika pekara nya maya aum media di Opis PKR Lanang ditu, kilah ensana.
George mega madah, Gabungan Parti Sarawak (GPS) diatu nampak mandangka diri ransing gawa kenyau ari perintah besai udah dipegai Pakatan Harapan (PH).
Ku iya, taja perintah nengeri udah bebendar ngaga pemansang infrastruktur di menua pesisir baka jalai alun, ai beresi enggau karan tang nyentuk ke sehari tu rayat mengkang sebana ketegal pemansang nya bisi penimpang.
“Ambika banding, rayat di Julau, Kanowit enggau Selangau suah bendar sebana laban karan di menua sida bepenanggul belama.
“Kelimpah karan, penanggul bekal ai beresi bela suah nyadi di Bintangor, Kanowit enggau Julau.
“Berindik ari nya kami ngarap opis menteri bekaul ba nengeri tu anang laun mutarka isu ke nyadi di zon tengah tu,” ku iya madah baru.
George madah, nyema perintah nengeri enda teputarka isu ke nyadi nya enggau lengkas, piak sida deka ngena pelin kedua iya nya terus minta saup ari perintah besai.
“Enti perintah nengeri nadai chara mantu rayat mutarka isu tu kami naka alah ngenataika peminta ngagai Opis Menteri Pemansang Menua Pesisir enggau Mensia Mayuh ngambi ngungkupka belanja ngaduka pemansang di menua pesisir ditu,” pia ku iya.
Bekaul enggau Pengawa Bepilih Nengeri (PRN) ti deka diatur nangkan ke tu ila, George andal deka meda perintah bekenaka duit rayat enggau jalai ti manah.
“Kitai deka meda perintah nengeri lebih agi ngemeratka pengidup rayat di menua pesisir ba di Kapit, Ngemah, Ulu Rejang, Sungai Asap enggau Mukah ari pekara bukai,” ku iya madah.
Ba isu bukai George madahka piak sida bela berasai nangi meda penyalah gian dadah majak nyadi nyengkaum tunga ke Sungai Asap, Belaga enggau Kapit.
“Penyalah rama baka tu enda ulih dipeda lempung kelimpah penusah enggau penanggul bukai nyengkaum penyampau orang ke empai bisi kereja mengkang mayuh di menua pesisir,” pia ku iya madah baru.