Gempung tu deka nentuka pengawa R&D dikena mansik chara baru ngetan, ngemansang bekal pemansut rampa menua ti ngasilka kuasa beresi
BINTULU: Shell Malaysia Ltd enggau perintah nengeri Sarawak, diarika Opis Menteri Pemansang Mengeri Enggau Pengeraja Asal kemari udah mantaika pengawa nyain Sempekat Pemereti Ati (MoU) ti enda dipejal ari undang-undang dikena pengawa ngintu, mulaika pemanah enggau nambahka rampa menua asal ba nengeri Sarawak tu.
Kepala Menteri Datuk Patinggi Abang Johari Tun Openg madahka nengeri tu deka bekerejasama enggau Shell ba pengawa ngiga enggau mansik chara baru ngena pengelebih rampa menua asal nengeri tu dalam pengawa ngintu biologi nengah kuasa beresi.
“Dalam polisi aku diatu, kitai dekaka semua sida ti megai konsesyen ba kayu batang ngambika nanam kayu ba kampung kitai, kayu ti ditebang meseti ditanam sida baru, tu deka nyadi pemansut ti tau dikena baru ngagai kitai seraya berebak enggau nya mansutka bekal oksigen ngagai dunya,” ku iya lebuh bejaku nyadi ketuai dipebasa rambau Pengerami Makai Lemai Gala Ngintu Genap Taun Ke-25 Shell MDS ba sebuah hotel ditu, kena lemai Hari Satu.
Ku iya, ba sukut pengawa mansik enggau ngemansang (R&D), Shell udah dikelala ba pengawa sida ngena teknologi baru kelebih agi dalam jeman revolusyen industri 4.0 ke alai kereban sensor bekuasa tinggi enggau ICT, nyadi peransang besai transformasyen dunya teknologi.
“Berundingka pekara nya, kitai pechaya ulih ngempungka teknologi, lalu ari pengeransing kitai ulih ngetanka rampa menua, kitai ulih ngasilka rampa menua ti manah sereta bepengerai ungkup pemaik semua,” ku Abang Johari.
Naka diatu, ba pengawa numbuhka kampung baru, ku Abang Johari, iya udah minta Opis Menteri Pemansang Mengeri Enggau Pengeraja
Dalam polisi aku diatu, kitai dekaka semua sida ti megai konsesyen ba kayu batang ngambika nanam kayu ba kampung kitai, kayu ti ditebang meseti ditanam sida baru, tu deka nyadi pemansut ti tau dikena baru ngagai kitai seraya berebak enggau nya mansutka bekal oksigen ngagai dunya. Datuk Patinggi Abang Johari Tun Openg Kepala Menteri
Asal, ngagai Opis Kampung ngambi bekerejasama enggau Shell ngatur projek mungkal nanam kayu ti jampat mansang dalam kampung Sarawak.
“Nyangka kitai tau mansik pengulih teknologi biomas, dikena ngasilka produk baru lalu enti kitai bisi kuasa ulih dikena baru, kitai ulih nyamin tu deka meri penguntung ngagai industri belalauka penegap kitai ba biomas lalu tu begunaka mayuh pengawa R&D.
“Perintah Sarawak sedia bejalaika pengawa nya begulai enggau Shell ungkup rebak dudi ti tau nyadi model dagang baru ngagai Shell, sereta nyadi kompeni mekal kuasa, aku nemu Shell mega deka mansang ngagai pengawa mekalka kuasa beresi,” ku iya nambah.
Ku Abang Johari, kandang diatu, perintah Sarawak mega dalam pengawa mansik pengulih mansutka hidrogen ari ai.
“Sapa nemu hidrogen ulih nyadi hidrogen ai lalu kitai ulih nganjung nya ngagai menua tasik ungkup kuasa beresi, nyangka kitai tau bisi kereja kunsi antara Shell enggau perintah nengeri,” ku iya.
Abang Johari nyemetak madah, meseti bisi juluk ungkup dudi hari ti deka ngasuh meretika pekara enggau nempa teknologi enggau proses baru, chara gawa ti ngena pemansut sereta pemansang ba penau beguna amat.
Nya kebuah iya meri terima kasih ngagai Shell ti udah meri peluang ngagai peranak menua tu, ngambika dilatih enggau ngiri penemu baru dikena sida mansang ke mua.
“Lebuh kitai ngintu genap taun ke-25 SMDS, kitai ngarapka diri ulih nyadi kaban dagang tetap ungkup dudi hari, 25 taun ti deka datai,” ku iya.
Ba lansa bukai, Chairman Shell Malaysia, Datuk Iain Lo madahka MoU tu pekara nyata ti ngayanka Shell keran deka ngurangka bekau karbon iya.
Shell enggau nengeri Sarawak ngaku ekosistem rampa asal baka kampung, tanah paya, tanah kerapa enggau bakau bisi pengulih ba pengawa ngurangka karbon jemah.
Berindik ari pengawa nyain MoU nya, komiti ditumbuh ari Shell enggau pengari ari Perintah Nengeri Sarawak deka mansik penau ba pengawa ngintu, mulaika pemanah enggau nambahka pengawa ba landskap rampa menua asal Sarawak.
“Pansik nyangka deka fokus ngagai pemansang program ti tegap, program ekonomi ti ulih besemekih belalauka rampa menua enggau dikemdar, nyimpul pengawa ngintu, nanam baru enggau nambahka landskap asal Sarawak, baka kampung, tanah paya, tanah kerapa enggau bakau,” ku Lo.
Shell bejalaika tanggungpengawa ba pengawa ngalih ngagai ngurangka korbon dudi hari.
Peminta tu begunaka macham bansa pengawa mutar belalauka rampa menua dikena nyediaka minyak kurang karbon ngagai penguna, nyediaka kuasa ulih dikena baru ari solar enggau angin sereta ngemansangka makit gis ungkup kuasa enggau perengka pengangkut,.
MoU tu ditempa ari kaul lama Shell enggau nengeri Sarawak, ti mungkur dagang kuasa asil ti keterubah, asil ke nangkan ke nya enggau asil dudi.
“Aku beterima kasih ngagai nengeri Sarawak laban udah setuju ngepunka pengawa tu enggau kami, baka ti udah digaga kita 25 taun ke udah enggau Shell MDS,” ku iya.
Antara bala bisi datai ngulu pengerami makai lemai nya iya nya Sapit Kepala Menteri Sabah Datuk Seri Panglima Wilfred Madius Tanggau enggau bini iya, Datin Seri Panglima Dr Jainah Sindian, Kabna Parlimen (MP) Bintulu Datuk Seri Tiong King Sing enggau ADUN Samalaju Majang Renggi.
Shell iya nya ngetuaika dunya dalam kuasa, tenaga enggau teknoligi gis sereta benung gawa nangkup peminta enggau bekal kuasa ti majak nambah dikena ngenataika produk ti makin pintar sereta kuasa beresi, infrastruktur enggau pemansang pemansut kuasa baru sereta mutarka pangka ngagai rampa menua.
Malaysia siti ari menua Shell. Sejarah Royal Dutch Shell di Malaysia berengkah ari lebih 125 taun ke udah. Shell ngembuan makit tegap ba sektor upstream enggau downstream di Malaysia.