Program penyedar bekaul pemaik tusu tubuh patut digaga ungkup bala indai
SARIKEI: Mayuh pengawa patut dipejalai dikena meri peransang ngagai bala indai meri tusu tubuh ngagai anak sida ba nengeri tu.
Pekara tu dipansutka Direktor Pengerai Nengeri, Dr. Jamilah Hashim rambau pengawa bejadi ngelacharka ‘World Breastfeeding Week’ Renggat Nengeri ba Palan Inovasyen Sarikei ditu kemari, laban taun tu semina 42.4 peratus ari bala indai ba nengeri tu meri tusu tubuh ngagai anak sida dalam enam bulan keterubah pengudah beranak.
Taja tu ngayan bisi nambah ari 14 peratus dalam taun 2013, mayuh pengawa patut dipejalai dikena nyapai tagit nasional 60 peratus, ku iya, seraya nambah, kelebih agi ba Bagi Menua Sarikei patut ngepunka program meri peransang nusu tubuh ti chakah agi laban iya diatu nyapai semina 28.4 peratus aja.
Atur program tu patut ngemeratka pemesai guna enggau pemaik ari pengawa meri tusu tubuh, lalu iya andal amat tu setipak enggau rambai jaku kimpin ‘World Breastfeeding Week– Breastfeeding: Foundation of Life’ taun tu, ku iya.
Tambah mega, susu tubuh udah diuji chara sains ngundan mayuh isi enggau nutrisi sebela datai ari karbohidrat, protein, vitamins enggau minerals ti diguna anak mit lebuh enam bulan keterubah pengudah ada, ku iya madah nyemetak.
Berindik ari pemesai guna enggau pemaik ari pengawa meri tusu tubuh tu, semua raban nyengkaum bala apai enggau komuniti patut nyukung kimpin tu, ku iya nandu, seraya nambah, siti ari pemaik iya nya udah mayuh nyelamatka formula susu tepung.
Nya alai, opis menteri udah datai enggau inovasyen nengah pengawa numbuhka Baby Friendly Clinic dalam taun 2015, ku iya, seraya nambah, perengka guna dikena meri peransang, nyaga enggau nyukung pengawa meri tusu tubuh ba premis nya.
Ba rikot, bisi 86 dikelala Baby Friendly Clinics dalam nengeri tu nyengkaum 12 ti nerima setipikit sida kemari.
Dikena nyapai pemutus nyulut agi, Baby Friendly Clinic udah dipinta bejalaika strategi baru dikelala enggau nama ‘ Nine steps toward a successful breastfeeding campaign’ diubah manah agi ari inisiatif Seven-Point Plan for Sustaining Breastfeeding in Community, United Nations Children Fund, United Kingdom Baby Friendly.
Semilan batang pengawa nyengkaum mayuh macham pekara ditagit dikena nyapai pengawa ngemeranka meri tusu tubuh nyengkaum latih ari bala staf pengerai, ku iya.
Nitih ku iya, naka diatu, bisi 60 raban nyukung meri tusu tubuh ba sepital, klinik enggau komuniti serata nengeri.
Antara sida ke bisi da- tai Sapit Direktor Pengerai Nengeri (Pengerai Mensia Mayuh) Dr. Nordin Saleh; Sapit Direktor Pengerai Nengeri (Lutur Ngeli) Dr. Yaw Siew Lian, Pemesai Pengerai Bagi Menua Sarikei, Dr. Emmanuel Joseph Fong, DHO Sibu, Dr. The Joh Hui enggau DHO Mukah, Dr. Huzaimah Husin.