Jalai ke Banting semina tinggal danji
KUCHING: Pemantu Khas Norina Umot Utot, Yen Jebeni madahka sida sebuat bisi nerima penatai siku apai tuai, peranak ari Rumah Limik ba Banting, niki ngagai Opis PKR Sri Aman, nganjung pom minta nyadi kaban parti nya kena pagi 27 Ogos tu tadi.
Lebuh sida sebuat bekenangka jalai ngagai Banting, iya lalu nusi sebana, lebih 20 taun pengelama, lebuh pengari rayat (perintah sebedau tu) madah deka ngaga jalai ke Banting.
“Pengawa nasih tanah mega udah berapa kali diatur sereta dipenyadika pengari rayat.
Ninga berita manah dibai sida tu, iya lalu mupuk nanam paung sawit, 500 pun.
Diatu udah manggai lima taun, lalu udah ngeluarka asil (buah),” ku tusi apai tuai nya ngagai Yen enggau ati ke chukup asa seraya dipendingka bala bukai.
Yen lalu nanya baka ni chara iya nyual asil sawit nya lalu saut tudah tuai balat ngasuh ati sinu sereta kasih.
“Nadai jalai endu, baka ni ka nyual, tejuka aku pia aja meh sawit nya.
Nadai daya bukai dikena mai buah sawit ngambika dijual ba pasar,” ku saut apai tuai nya ngagai Yen.
Jaku semaya bala pengari rayat suba baka nama deka ngaga jalai ke Banting, tang nyentuk sehari tu lalu nadai, ku Yen madah lebuh dirandau pengarang berita.
Nya kebuah ku Yen, peranak ba nengeri tu patut sedar lalu berani nerima ubah, pemansang infrastruktur enggau penyikap perengka guna semina ulih digaga enti kitai dipegai perintah ti siru sereta beratka peminta enggau pengelantang rayat.
“Renggat perintah besai kitai udah dipegai Pakatan Harapan, ti ulih endur kitai ngelempaika pengandal ngemai pemansang ngagai nengeri tu.
Udah umbas endur kitai sedar sereta nukar ketuai ti megai perintah nengeri maya Pengawa Bepilih Nengeri (PRN) ti deka datai,” ku Yen madah nyemetak.
Mayuh semaya bukai, tebal agi enda dikeamatka bala ketuai tauka pengari rayat sebedau tu lalu tu balat ngasuh peranak menua nya asa.
Taja pia, Yen temegah ati beratika majak mayuh peranak menua Simanggang udah muka runding diri lalu sedia nyadi kaban parti nya, kelebih agi menua ti nyadi kubu tegap parti megai perintah sebedau tu.