Norina besemaya deka terus ngabas peranak Simanggang kelebih agi di pesisir
KUCHING: Ex-chalun Parti Keadilan Rakyat (PKR) Sri Aman, Norina Umoi Utot ngamatka semaya diri deka seruran bejalai ngabas seraya nemuai ngagai peranak ba kandang menua Simanggang kelebih agi sida ke diau jauh di menua pesisir enggau ulu sungai.
“Chukup sinu lebuh ninga serebana sida madahka diri nadai kala diabas bala ketuai sebedau tu, kelimpah ari maya bekimpin bediri minta pilih.
“Aku sigi ari pun bejalai ngagai menua sida endang madahka diri, baik nya menang tauka alah ba pengawa bepilih, deka seruran ngabas sida,” ku Norina lebuh dirandau pengarang berita.
Norina mansutka jaku tu rambau ngulu Pengawa Bejadika Ranting enggau Pengawa Nyuaka Pom Nyadi Kaban PKR P202 Sri Aman ba Rumah Tanchin, Kampung Banting, Nansang Ili, apin lama ke udah.
Pia mega ku Norina, tuju bukai pejalai sida sebuat laban deka nanggam teguh agi kaul ke bisi diatu begulai enggau peranak menua nya seraya betanyaka berita, ngempung serakup, ngaul sida semak agi.
“Meda mua sida ke tuai, bala nembiak mit ngingatka aku reti enggau gaya pengidup ba rumah panjai lebuh aku agi mit menya.
“Ukai nangika bisi pemerindang bukai lebuh lemai hari, duduk ninga sida ke tuai nusoi ensera, suah mega bepantun tauka belalaika entelah. Chukup rindu rambau nya,” ku Norina nikalka kenang diri lebuh ngelansa pejalai iya apin lama ke udah.
Nitih ku Norina, penatai sida sebuat disambut ngena basa ti chukup ari peranak dia, nengah ajat ngelalu pengabang dibantaika sida ke dara lalu ditiki ke rumah ngena pengaya adat kitai Iban.
“Nadai ngadang penatai kami sebuat sekali tu diterima enggau ati lantang. Mayuh batang randau dikenang kami lebuhka betunga enggau pangan diri. Chukup rindu ninga pekara dibantaika sida.”
Kitai bela nemu ku Norina, menua Banting tu kena pegai Pelilih Mit Lingga, di baruh pegai Sri Aman tauka Simanggang, nama asal iya.
“Banting tau disema baka menua pulau, enda ibuh disebut pemansang bukai baka infrastruktur, indah bekal ai beresi pin nadai ditu.
“Ari lansa kenang kami sebuat lebuhka merau tadi, berapa kali udah pengawa nasih tanah dipenyadika pengari rayat sebedau tu, lalu tetiap kali pengawa tu diatur, peranak endang ngandalka diri bisi jalai kenyau ari 20 taun ke udah.
“Ukai deka bejaika rita bala pengari rayat sebedau tu enggau iya (pengari rayat) ke diatu, kitai ulih meragam sereta nyata meda, menua Banting tau dikumbai nadai pemansang.
“Aku chukup muji penaluk peranak ditu ngagai pengari rayat kita. Tang diatu kita udah sedar, patut berubah nitihka singkang jeman. Perintah renggat perintah besai udah ngalih ngagai Pakatan Harapan (PH). Nya kebuah aku ngemai kita sekayu menua, bela ngalih lalu negika perintah baru di nengeri tu, maya Pengawa Bepilih Nengeri ila,” ku Norina meri peransang.
Antara bala ti bisi datai Tuai Rumah Samion, Tuai Rumah Jacob, Tuai Rumah Bruin enggau Tuai Rumah Baya sereta nembiak redak sida bela sampal ngambat penatai Norina enggau bala bukai.
“Norina tu ketuai keterubah ti puh bejalai ngabas kami semenua sekayu ai Lingga, kemerah sereta ngembuan ati siru enggau mentas,” ku Tuai Rumah Tanchin madah ngarika bala bukai.