Ungkup belanja ke diberi GPS nyadi penyelamat projek ari perintah besai
KUCHING: Ungkup belanja RM5 juta ke diberi ngagai Kaban Parlimen Gabungan Parti Sarawak (GPS) dikena bejalaika Projek Transformasi Menua Pesisir (RTP), nyadi penyelamat projek perintah besai.
Kaban Parlimen Sibuti, Lukanisman Awang Sauni madahka ungkup belanja RTP ari perintah nengeri ulih nangkup projek ke diperambu sereta ulih ngemansang sitak ke diarika GPS.
“Kitai ( MP) amat beterima kasih ngagai Kepala Menteri ( Datuk Patinggi Abang Johari tun Openg) enggau perintah nengeri ti ngungkupka belanja nengah projek nya.
“Ungkup belanja nya ulih nangkup projek ti berega RM50,000 ngagai RM100,000 sereta enggau langgur ti manah enggau ADUN, aku ngasaika sitak ke dipegai GPS ulih terus dikemansangka,” ku iya lebuh dipinta ngenang perintah nengeri ti ngungkupka RTP ngagai MP GPS.
Dulu ari nya, Lukanisman sama bisi datai ngagai ‘Majlis Amanat Yang Amat Berhormat Ketua Menteri Bersama Ahli-Ahli Dewan Undangan Negeri’ ke diatur ba sebuah hotel ditu kemari.
Berebak enggau tu iya madahka MP ti ukai ari Pakatan Harapan (PH) nadai udah nerima sebarang penerang bekaul enggau ungkup belanja ari perintah besai.
Ku iya maya Dewan Rakyat, saut ari menteri ti bekaul baka projek rumah ditangguhka dulu, program 1Malaysia diberi nama baru, projek sekula bekaul enggau IBS mega dipasuk dalam kategori dipansik baru.
“Bisi dua kali sesi meri penerang pengari rayat ukai PH tang dikinsil...nyentuk ke diatu agi nganti saut.
“Nya alai naka ke diatu enda ngira bagi projek ke disemaya sebedau tu baka ngemanahka baru rumah enggau sekula ba sitak diarika aku, aku ngena ungkup belanja RTP ari perintah nengeri, ke nyadi penyelamat ngagai projek perintah besai,” ku iya.
MP mega bisi nerima ungkup belanja RM200,000 ari perintah nengeri dikena ngelancharka pengawa enggau mayar gaji pengereja pengawa ba pusat khidmat MP GPS.
Berebak enggau tu,Sapit Ketuai Publisiti Parti Rakyat Sarawak (PRS) Christopher Gira Sambang bepenemu ungkup belanja RM5 juta RTP ari perintah nengeri nya amat besai guna, kelebih agi di menua pesisir.
Iya madahka pengari rayat dipinta ngerintaika projek ngagai Unit Pelaksanaan Pemantauan Negeri (SIMU) lalu projek nya mega ukai terus nengah pengari rayat sekalika MP tauka ADUN tang ngagai ejensi perintah nengah tinda.
“Ungkup belanja nya ke diagih ngagai ADUN sereta MP amat beguna lebih agi ngagai Kaban Parlimen PRS ti tebal agi ngarika menua pesisir, ambis nadai ulih bejalaika pemansang projek.
“Menua pesisir amat begunaka pemansang nengah ungkup belanja ngena projek tu,” ku ADUN Tamin dikerandau pengudah ngulu program nya. MIRI: Gerempung Ngemansang Industri Kayu Ramu Sarawak (PUSAKA) mujur ngatur Program Licha Sentang Batang Pengawa enggau Peluang Latih dalam industri kayu ramu, nyerumba genap 45 taun ditumbuhka, ensanus.
Pemangku Penulung Menijar Besai PUSAKA Kandang Menua Utara, Dahrawi Muhammad madahka program nya ungkup urung 100 iku nembiak form 5 Sekolah Menengah Kerajaan (SMK) Bakong Miri.
Program ti masuk siri ke-5 di serata Sarawak dipenyadika Dahrawi.
“Nengah program tu, kitai deka ulih meri motivasyen ngagai nembiak ngambika deka masuk dalam industri kayu ramu.
“Kelimpah ari nya peluang endur nempa modal mensia ti bisi kualiti sereta ulih nyadi ketuai,” ku iya lebuh bejaku seraya bejadika program ke diatur ba SMK Bakong, Miri.
Entara aktiviti ti dipejalaika baka licha sentang batang pengawa enggau latih, kuiz enggau licha motivasyen ti dipejalaika ulih Abang Faiz Kadir.