Tetiap iku ADUN enggau MP GPS diungkupka RM5 juta dikena ngemujurka enggau projek pemansang di menua pesisir
KUCHING: Kepala Menteri Datuk Patinggi Abang Johari Tun Openg puas ati enggau pengelanchar Projek Transformasi Menua Pesisir (RTP) ti dipejalaika Kaban Kunsil Nengeri (ADUN) Gabungan Parti Sarawak (GPS).
Ngagai Kaban Parlimen ( MP) GPS, taja pan taun tu taun keterubah perintah nengeri ngungkupka RTP, tang Abang Johari ngarapka sida nya mega ulih ngayanka penyulut baka ADUN.
ADUN GPS tiap taun diagihka RM5 juta dikena bejalaika RTP enggau projek pemansang di menua pesisir, lalu MP GPS mega keterubah iya diagihka perintah nengeri RM5 juta ungkup RTP.
“Au (puas ati). Gaga ati meda pejalai projek, pengawa matau enggau agih projek RTP ke dipejalaika nengah ADUN.
“Laban tu keterubah MP kitai diungkupka RTP, kitai nelebaka sida, ba sida ADUN,” ku iya.
Abang Johari mansutka pekara nya lebuh dikerandau raban pengarang berita pengudah tembu ‘ Majlis Amanat Yang Amat Berhormat Ketua Menteri Bersama Ahli-Ahli Dewan Undagan Negeri’ ba sebuah hotel ditu, kemari.
Bejaku baru, iya madahka program nya ngenang pekara bekaul enggau proses ngemendarka RTP nyengkaum
Au (puas ati). Gaga ati meda pejalai projek, pengawa matau enggau agih projek RTP ke dipejalaika nengah ADUN. Datuk Patinggi Abang Johari Tun Openg Kepala Menteri Sarawak
ngagih, matau sereta bejalaika projek.
“Laban kitai bisi MP baru lalu MP pan diungkupka RTP, nya kebuah kitai nerangka proses sereta bakani projek nya disediaka tauka dipejalaika,” ku iya.
RTP diberi kelala niang Pehin Sri Adenan Satem ba taun 2010 lebuh ke nyadi Kepala Menteri, ti semina diberi ngagai ADUN aja tang berengkah taun tu nengah iring Abang Johari ungkup belanja RTP dikerembaika ngagai MP, pengudah perintah besai dipegai Pakatan Harapan ketegal Barisan Nasional sebedau nya nyadi perintah besai alah ba pengawa Bepilih Besai Ke-14.
Kelimpah ari nya, perintah nengeri mega bisi ngagihka RM200,000 ngagai MP ungkup palan servis.
Program nya berengkah pukul 10 pagi sereta tembu ngalih hari kemari.
Program nya digulu Sapit Kepala Menteri Datuk Amar Douglas Uggah Embas sereta Datuk Amar Awang Tengah Ali Hasan sereta bala ADUN GPS kelimpah ari MP GPS ke sama dikangau datai, lalu ke bisi datai baka MP Petra Jaya Datuk Seri Fadillah Yusof, MP Samarahan Rubiah Wang enggau ke bukai.