GPS mengkang dalam proses dikemendarka ROS
KUCHING: Gabung Parti Sarawak (GPS) dalam proses dikemendarka Opis Pengerejista gerempung (ROS) sereta semina nganti dipadahka aja, pia ku Chairman Komiti Teknikal GPS, Datuk Alexander Nanta Linggi.
Iya madahka semua nama ke diguna bekaul enggau penumbuh gempung parti nya, udah diberi ngagai ROS sereta semina pemutus ari ROS.
Ditanya sekalika pekara bekaul enggau pemansang GPS entara pekara dikenang Kepala Menteri Datuk Patinggi Abang Johari Tun Openg dalam pesan iya, Nanta madahka, nadai.
“Iya ( Kepala Menteri) nadai nyebut pasal rejista GPS tang naka ke diatu pekara nya agi dalam progres.
“Aku enda nemu ni pengelama ROS ngatur tang ba kami GPS semua ti bekaul udah diberi ngagai ROS, diatu bepanggai ngagai sida.
“Pemadu baru didinga kami ari sida (ROS) proses bejalai enggau teratur. Semina nganti sida (ROS) madah ngagai kami,” ku iya ti mega Kaban Parlimen Kapit sereta Sekretari Besai Parti Pesaka Bumiputera Bersatu (PBB).
Nanta dikerandau raban pengarang berita pengudah ti sama bisi datai ngagai ‘Majlis Amanat Yang Amat Berhormat Ketua Menteri Bersama Ahli-Ahli Dewan Undangan Negeri’ ba sebuah hotel ditu, kemari.
GPS, iya nya gempung parti politik Sarawak dipasuk empat parti ti kala enggau Barisan Nasional iya nya PBB, Parti Rakyat Sarawak (PRS), Parti Rakyat Bersatu Sarawak ( SUPP) enggau Parti Demokratik Progresif (PDP).
Gempung nya ditumbuhka berindink ari BN ti alah ba Pengawa Bepilih Besai Ke-14 ke diatur kena 9 Mei taun tu sereta tetap nyadi penyakal ba rengat perintah besai ti dipegai Pakatan Harapan (PH), taja pia madahka sedia bekerejasama.
Kelimpah ari nya Nanta lebuh ditanya bekaul enggau pesan kepala menteri, iya madahka Abang Johari meri penerang sereta betemu enggau lebih agi bala ADUN lalu MP dikanggau sama datai.
Nitihku iya dalam program nya semua pengari rayat diperansang meri servis ti engkeman ngagai rayat.
Ditanya sekalika bisi nye- but pasal penyikap betapi enggau Pengawa Bepilih Nengeri (PRN) Ke-12, Nanta madahka semua pengari rayat endang seruran sedia.
“Udah tentu kami nyikap diri ari diatu ( napi PRN), baka ke ngelama tu iya (Abang Johari) ngelalau ngambika semua pengari rayat ngabas rayat sereta regas gawa lalu meri servis ngagai rayat,” ku iya.
Berebak enggau tu ADUN Dalat ti mega Ketuai Raban Orang Indu PBB, Datuk Seri Fatimah Abdullah madahka pekara ke dibantaika kepala menteri endang bekaul enggau semua pengari rayat.
“Kami ngasaika tu siti peluang ti manah laban YAB terus ngaul kami, ngambika kami nemu nama pemansang ke pemadu baru bekaul enggau isu ke nyadi.
“Semua pekara ti dikereja tauka dipejalaika kami endang ungkup rayat enda ngira maya.
“Nya pekara ti dikemerat YAB ngagai kami iya nya minta kami terus meri servis ngagai rayat. Nya pesan iya ti pemadu beguna,” ku iya nyaut lebuh ditanya sekalika pesan kepala menteri bisi nyebut pasal PRN.