Aku entap enggau GPS, ku Mawan
KUCHING: Kaban Kunsil Nengeri (ADUN) Pakan Tan Sri William Mawan Ikom bebendar madah diri dalam Gabungan Parti Sarawak (GPS) sereta nadai nyereta Parti Keadilan Rayat (PKR) baka ti diberitaka.
Iya madahka diri entap enggau GPS dikena neruska pejalai politik, lalu berita ti madahka iya nyereta PKR semina berita selebubu ketegal deka bejai reputasi dalam politik.
“Nadai, nadai, nadai. Anang ngaga spekulasyen ba mayuh pekara. Anang meri penerang.
“Aku kaban GPS. Penatai aku ngulu tu mega enda patut dipeda nyelai tauka enda patut iya dikenang.
“Nama kebuah orang meda aku ari perspektif bukai? Anang meda aku enggau chara ti bebida,” ku iya lebuh dikerandau raban pengarang berita.
Dulu ari nya Mawan sama datai ngagai ‘ Majlis Amanat Yang Amat Berhormat Ketua Menteri Bersama Ahli-Ahli Dewan Undagan Negeri’ ti diatur ba sebuah hotel ditu, kemari.
Iya meri penerang nya lebuh ditanya bekaul enggau berita selebubu ti madahka iya mantu chalun penyakal kimpin ba Pengawa Bepilih Besai Ke-14 lalu bisi perambu deka nyereta Pakatan Harapan.
“Aku landik ngena media, nya alai anang mih musinka (penerang),” ku iya nyaut lebuh tanya kebuah lama nadai betemu enggau raban pengarang berita tang kemari bisi datai ngulu program nya.
Kena 14 April taun tu, ngenyitka mensia mayuh, lebuh dipadahka kenyau ari taun 2016 iya siku ari kaban Parti Pesaka bumiputera Bersatu (PBB).
Dalam politik, Mawan sebedau tu kala nyadi presiden Parti Demokratik Progresif Sarawak lalu ninggalka parti nya sereta numbuh lalu nyadi presiden Parti Tenaga Rakyat Sarawak (TERAS) ba taun 2014.
Taja pia ngambika ulih ngetanka sitak DUN Pakan ba PRN-11 2016, Mawan nyerara diri ari TERAS ngambika ulih nyadi chalun terus Barisan Nasional (BN).