Chong patut bebendar mantu S’wak ngulihka belanja ari perintah besai
KUCHING: Chairman Pakatan Harapan ( PH) Sarawak Chong Chieng Jen enda patut nyalahka orang bukai tang patut mantu Sarawak ngulihka ungkup belanja ari perintah besai.
Ketuai Raban Nembiak Parti Pesaka Bumiputera Bersatu ( PBB), Gerald Rentap Jabu madahka iya (Chong) patut bebendar ngulihka mayuh ungkup belanja ari perintah besai dikena ngemansangka nengeri tu, anang semina nyalahka orang bukai.
Laban ku iya, pengawa ngemansangka nengeri tu tanggungpengawa semua rayat Sarawak nyengkaum Chong.
“YB Chong enda patut nyalahka orang bukai. Kitai semua rayat Sarawak, Chong mega rayat Sarawak, patut besaup ngemansangka nengeri tu.
“Sida udah mujur numbuhka perintah besai Pakatan Harapan (PH), nya alai ungkupka mayuh belanja pemansang ngagai Sarawak,” ku Kaban Kunsil Nengeri (ADUN) Layar nya.
Iya mansutka penemu nya lebuh dipinta meri penerang bekaul enggau penerang Chong Hari Tiga tu tadi ti madahka Gabungan Parti Sarawak (GPS) nyadi kebuah mayuh bagi menua ba nengeri tu agi tinggal di belakang senentang enggau pemansang, bererebak enggau tu semua ti kala nyadi pemesai Barisan Nasional ( BN) ngumpul pengaya kediri empu.
Berebak enggau tu Rentap madahka Chong bisi dua taun agi endur iya mandangka diri ulih mantu rayat Sarawak ngelancharka pejalai pemansang di nengeri tu kelebih agi di menua pesisir.
Dulu ari nya Rentap sama bisi datai ngagai ‘ Majlis Amanat Yang Amat Berhormat Ketua Menteri Bersama Ahli-Ahli Dewan Undagang Neger’ ke diatur ba sebuah hotel ditu, kemari.
Ngenang program tauka majlis nya, iya madahka Datuk Patinggi Abang Johari Tun Openg ke nyadi Kepala menteri minta semua ADUN lebih agi dibaruh GPS ngambika terus regas gawa sereta suah betemu enggau mantu rayat.
“Iya deka kami ngemanahka agi pejalai projek dibaruh Projek Transformasi Menua Pesisir (RTP) ke pengelantang rayat,” ku iya seraya madahka Abang Johari deka manataika berita pemadu beguna maya Aum Kunsil Nengeri bukan November nyengkaum belanja nengeri ba taun 2019.
Kelimpah ari nya ADUN Tupong ti mega Sapit Ketuai Nembiak PBB, Fazzrudin Abdul Rahmah lebuh dipinta ngenang pekara ke dikenataika kepala menteri, iya madahka, program betemu nya lebih ngagai ngelalau bala ADUN enggau Kaban Parlimen (MP).
Abang Johari ku iya, ngingatka pengari rayat ngambika mekuh meri servis ngagai raban bansa seraya ngigatka ngambika ngembuan semengat taluka menua enggau nengeri, kelebih agi nyerumba Hari kemerdekaan.
“Kepala Menteri ngelalau kami ngambika meri servis engkeman ngagai raban bansa sereta chakah turun padang betemu rayat,” ku iya seraya madahka pengawa betemu nya lebih ngagai sesi menyadi tuai begulai enggau adi sereta apai enggau anak.