Hari Kebangsaan ke dirami kena 31 Ogos ninting taun ngembuan pemaik enggau guna kediri empu: Andrew
SARIKEI: Rayat Malaysia patut ngangkatka semangat patriotik ngambi rayat pupu bansa, pengarap enggau main asal ngambi terus ngasaika pengerami Hari Kebangsaan dalam pengelantang enggau pemaik.
Kaban Parlimen Sarikei Andrew Wong Ling Biu madah, Hari Kebangsaan ke dirami ninting taun ngembuan pemaik enggau guna kediri empu.
“Kebuah pia laban hari nya endang hari besai menua ke patut dirami lalu diperatika semua rayat ti sayauka menua tu.
“Dikena nerenakka semangat patriotik enggau sayau ngagai tanah ai, apai indai, pengibun, pengajar enggau komuniti ngembuan tanggungpengawa ke chukup berat lebih agi ba pengawa ngajar raban nembiak awak ngelala reti merdeka.
“Pengawa tu beguna amat dikena nentuka pendiau
Kebuah pia laban hari nya endang hari besai menua ke patut dirami lalu diperatika semua rayat ti sayauka menua tu. Andrew Wong Ling Biu Kaban Parlimen Sarikei
menua tu merdeka deka terus diintu sampai ke jemah ila,” ku iya.
Iya madah munyi nya rambau Program Merdeka@ Komuniti, Kempen Nuat Jalur Gemilang ba Taman Tasik Sarikei, lemai ensana.
Program diatur Opis Pemadah Malaysia Bagi Sarikei nya dirichah enggau penatai lebih 500 peranak ke diau besemak.
Andrew madah, rambai jaku Hari Kebangsaan 2018 ke dipansutka Menteri Besai Tun Dr Mahathir Mohamad iya nya ‘Sayangi Malaysiaku’ endang engkeman laban iya nyepu semangat ngagai rayat Malaysia pupu bansa, pengarap enggau main asal bela mandangka penyayau ngagai menua.
Udah nya, ku iya rambai jaku nya mega nesau rayat Malaysia terus ngemeranka ulah bebasaka pangan diri laban nya tau mai pengelantang enggau penyenang.
“Malaysia tu palan diatu ke chukup manah ngagai kitai, nyadi kitai patut ngibuh enggau beguna pengidup ke lebih manah.
“Nya alai, kitai patut gaga ati nyadi ‘Anak Bangsa Malaysia’ dikena ngelakuka pengelantang enggau penyenang selampur rayat.
“Malaysia diatu manggai umur 61 taun kenyau merdeka kena 31 Ogos 1957 lalu ngagai pemansang mengeri enggau menua pesisir nyadi agenda besai perintah lalu fokus pekara nya enggau berat.
“Tu mih dikena nentuka menua ulih besemekih enggau menua-menua ke udah maju ba dunya,” ku iya.
Mayuh program diatur sepanjai program nya baka pekit nyura ungkup anak mit enggau orang tuai, pekit ensikal berias, senamrobik enggau mandangka ‘busker’ menua tu.
Bela datai Pemesai Opis Pemadah Sarikei Mohamad Sahrizan enggau staf Opis Pemadah Malaysia Sarikei.