Raban nembiak baru patut ngetan pengelantang, pengelikun menua
KUCHING: Mensia mayuh lebih agi nembiak rebak baru patut ngetanka pengelantang enggau pengelikun ke diasai diatu ke pemaik enggau ngasai reti merdeka ke amat.
Siku orang pinchin soldadu, Eaton Ngipa, 40an ke dirandau Utusan Borneo madah, nembiak rebak baru ke dikelala enggau gelar Gen Y sehari tu chukup betuah laban kenyau ari ada udah ngasaika penyamai, pengelikun lalu nadai penyarut dibanding enggau jeman iya suba.
“Maya jeman kami, semua nya nadai tentu lalu nyawa seruran dikeruga ukai semina maya jeman pegai British, tampung pegai Jipun enggau komunis kelimpah penyarut dikachau soldadu Indonesia,” ku iya.
“Nembiak ke maya hari tu patut nemu merdeka ke diasai sehari tu ukai ditampung ari jeman tang digaga nengah ai mata anak nini enggau apai indai lenyau orang ke disayau kelimpah darah naya maya ke betempuh nyatup munsuh.
“Nyadi nya, deka tauka enggai meseti tanka pengelantang diatu laban numbangka sebuah menua ngambi timpuh enda datai sehari tang nempa sebuah menua ke merdeka enggau lantang beguna timpuh ke lama sereta pedis,” ku iya.
Eaton pinchin 2011 pngudah gawa enggau Raban Soldau Malaysia pengelama 21 taun ba markas kepenudi Markas Satu Divisyen Infantry Malaysia, Pampang Kuching. Iya agi regas lalu kala nerima Anugerah Penyulut Pengawa (APC) taun 2005 enggau 2009.
Sekumbang nyadi soldadu iya kala gawa ba tiga bengkah servis iya nya Rejimen Gerak Khas Diraja (Komando), Rejimen Infantri Renjer Diraja (RRD) enggau Kor Sevis Am (KPA Gaji enggau Elawin).
Tandu Pegawai Waran 1 nya mega, iya deka bala nembiak milih pengawa nyadi soldadu laban nya jemah deka nempa sida nyadi siku rayat ke beguna ngagai menua, bansa enggau pengarap.
Nerang silik, iya madah diri asa mimit enggau ulah nembiak ke maya hari laban nyau baka nadai ingatka reti merdeka ke amat lalu ngumbai Hari Merdeka nya siti pengerami aja.
“Merdeka tu ukai utai ke muntang dijapai... nya alai aku meransang rayat enda ngira bansa enggau pengarap sereta penatai diri bela meri terima kasih ngagai penyamai bekau buah merdeka laban kitai ada maya menua udah lama tuai enggau merdeka,” ku tandu Eaton.