Sarawak pemadu bebendar ngangkatka ulah integriti

SARIKEI: Sarawak pemadu bebendar ngangatka ulah integriti, ku Menteri ba Opis Kepala Menteri ( Integriti enggau Ombudsman) Datuk Talib Zulpilip.

Iya madah, perintah Sarawak sigi enda belembut enggau ketuai ke ditemuai makai suap enggau salag guna kuasa ke penguntung diri empu aja.

“Berebak enggau nya dikena nagang ulah makai suap, kerejasama enggau semua piak beguna amat.

“Komuniti ku iya, patut regas ati mantu perintah nyadi mata enggau pending perintah mutarka penanggul tu.

“Mensia mayuh patut sedar sebarang penyalah nyengkaum ulah makai supa tau ngelemika atur pengawa enggau tusun dalam magi asil belanja,” ku iya.

Iya madah munyi nya rambau Program Integriti Begulai Enggau Ketuai ba Palan Inovasyen Sarikei (SIC) ditu, kemari.

Program nya digulu lebih 180 pesereta lalu nyadi sebagi ari inisiatif dikena mantu perintah munaska semua penyalah ti bekaul enggau ulah integriti.

Kenu ku Talib, perintah seruran bejalika pengawa matau baka ke diasuh Komiti Penagang Penyalah Makai Suap (MRSM) dikena nulak sida ari majak beambi ulih ba renggat baruh.

“Atur tu endang tampung pejalai pengawa ketuai lebih agi dalam ngiring nengeri tu.

“Ketuai ke manah patut nyadi chunto ngagai orang ke diiring iya.

“Laban ke nyadi orang ti bisi kuasa matak orang, dibasa, sida patut nyeliah diri ari penyalah makai suap ke ulih ngamahka pemanah nama sida empu,” ku iya.

Sama bisi datai Menteri Muda Kaunsil Kandang Menua Datu Dr Penguang Manggil, Menteri Muda Pengatur Mengeri, Pengatur Pengawa enggau Rampa Menua, Datu Len Talif Salleh, Direktor Unit Integriti enggau Ombudsman Nengeri Adana Jed, Kaban Parlimen Sarikei Andrew Wong Ling Biu, Kaban Kunsil Nengeri (ADUN) Maradong Datuk Ding Kuong Hiing enggau Residen Sarikei Mohamad Junaidi Mohidin.