Beduduk ari nya protem Bersatu nagit matak 50,000 iku peranak nengeri tu nyadi kaban parti taun sebedau unjung taun tu
KUCHING: Raban Protem Parti Pribumi Bersatu Malaysia (Bersatu) nagit matak 50,000 iku peranak nengeri tu nyadi kaban parti ba taun tu.
Pengari raban nya, Affendi Jeman madah naka ke diatu, Bersatu di Sarawak udah nerima 19,688 pom masuk parti.
“Kitai keran numbuhka 31 pampang ditu, iya nya ba semua 31 sitak parlimen.
“Tu dikena mandangka sukung sereta ngemujur juluk Tun Mahathir ke nyadi chairman ti deka meda Bersatu entap di Sarawak.
“Kitai nagit ngempuru 50,000 kaban parti sebedau ujung taun tu lalu Bersatu Sarawak deka dilanchar Tun Mahathir,’ku Affendi ba aum pengarang berita di Kuching kemari.
Kelimpah ari nya, Affendi mega madah raban protem ngembuan juluk matak 200,000 iku peranak nengeri tu nyadi kaban parti.
Ku iya, juluk nya ulih dijapai bepelasarka ubah gaya politik ke nyadi maya ke diatu.
“Kitai ngarap juluk tu ulih dijapai sebedau pengawa bepilih nengeri ke 12 ti deka diatur ba taun 2021.
“Kaban dalam parti tu mungkur pupu bansa ke nguan Sarawak iya nya Melayu, Iban, Orang Ulu, Bidayuh, Melanau, Penan, Kenyah, Kayan enggau Kelabit,’ku iya.
Ngenang kaul ke sama, Af- fendi netapka raban protem deka ngereja pengawa enggau bebendar.
Pemujur ba pekara nya ku iya deka nentuka juluk Tun Mahathir nyadi nyata.
“Aku pechaya majoriti rayat Sarawak deka nyereta Bersatu,’ku iya.
Aum pengarang berita kemari bela digulu ex-Kaban Parlimen (MP) Mas Gading Datuk Dr. Tiki Lafe ke alai iya udah nganjung pom masuk Bersatu.
Kitai nagit ngempuru 50,000 kaban parti sebedau ujung taun tu lalu Bersatu Sarawak deka dilanchar Tun Mahathir. Affendi Jeman Pengari Raban Protem Bersatu