Pekit leka main Iban chara dikena ngerembaika pemanah Jaku Iban
BINTANGOR: Sekula Primari ( SK) Sungai Kawi, Meradong 2018 udah mujur ngatur Pekit Leka Main Iban enggau kerejasama ari sekula sereta Palan Pematih Pengajar (IPG) Kampus Rajang kena 28 Ogos tu kemari. Program tu dilanggur sereta diatur 3 iku pengajar pelatih ti benung bejalaika praktikum enggau internship ba sekula nya enggau bantu ari bala pengajar sekula tu. Bisi 42 iku pesereta ti ngambi bagi dalam pekit tu iya nya ari nembiak primari 3, 4 enggau 5. Penyereta tu dibagi ngagai 5 raban lalu genap raban ngenataika leka main ti bebida.
Bansa leka main ti dipekitka iya nya Ramban, Indung-indung, Dindang, Dit Dinai enggau leka main Dum Duna.
Raban ti nyadaka leka main dindang udah mujur teulihka champion lalu ditangkanka enggau raban leka main ramban enggau dit dinai. Raban ti menang tu dipeda dalam mayuh kriteria baka kerejasama, kreativiti, pengingat ngagai leka main enggau ngepan ti dikena
Kelimpah ari nembiak sekula SK Sg. Kawi, bala pengajar sereta apai indai bisi datai meda pekit tu.
Cik Rosetha Teo, Penolong Kanan Kurikulum sekula tu dalam jaku iya madahka pekit tu keterubah nya diatur di sekula tu. Pekit tu ngenataika mayuh pemanah ngagai nembiak, apai indai enggau bala pengajar.
“Pekit ti mandangka leka main asal bansa Iban tu manah amat diaduka laban nembiak baru diatu mayuh bendar enda nemu pasal leka main Iban. Pekit tu manah bendar enti ulih dipejalaika ninting taun laban iya nempa nembiak ti berani mantaika diri ba mua mayuh lalu narak pengerindu sida dalam nguasa leka main Iban,” ku iya.
Nambahka nya, ketuai akim pekit, pengelicha ari IPG Kampus Rajang Ngabong anak Katoi mega bisi ngenataika penemu selampur pasal pekit leka main nya. Iya muji bala nembiak ti udah bebendar lalu meri penerang pasal leka main Iban.
“Meri tabi puji ngagai semua nembiak ti udah nyadi penyereta pekit tu laban udah bebendar belatih sereta ngingatka leka main.
“Tu siti ari chara dikena nguasa leka main Iban iya nya ngingat sereta enda lembau nyebut leka main nya. Leka main kitai Iban tu patut bendar diturunka ngagai nembiak redak ngambika enda lela laban tu mih ke nyadika kelai Jaku Iban ti endang ngembuan penyelai kediri empu,” ku iya lebuh ti meri jaku pengudah pekit nya diatur.