Peragam runding ngumbai pengawa tu kamah, mar sereta ungkup orang umang enggau enda bepelajar patut dikemetul
KUCHING: Peragam runding ke ngumbai pengawa betanam betupi sebengkah pengawa ke kamah, mar sereta ungkup orang umang enggau enda bepelajar patut dikemetul.
Sapit Kepala Menteri Datuk Amar Douglas Uggah Embas madah peragam runding nya enda betul ke alai ba jeman diatu, pengawa betanam betupi udah nyadi siti pengawa dagang.
“Pengawa betanam betupi diatu majak ngerembai lalu ulih nempa orang dagang betanam ke ngembuan penatai pemisi tinggi,”ku iya.
Uggah mansutka jaku nya rambau bejadi Konvokesyen Ke-13 Institut Pertanian Sarawak, Semongok ditu, kemari.
Dikena metulka runding nya ku Uggah, perintah nyendia sekeda inisiatif baka ke meransang atur nguna teknologi tinggi bepelasarka ‘smart and precission farming’.
“Opis menteri kitai meransang chara Sistem Fatigasi ke diperabung ‘Sistem Jejaring’ ba pengawa nanam sayur enggau buah.
“Chunto ke ulih dipeda diatu iya nya ba Program TPKM di Rampangi ke udah matak 18 iku orang dagang ngaul diri ba pengawa betanam betupi,’ku Uggah.
Penyereta program nya ku Uggah dipilih ari raban orang bepelajar iya nya sida ke udah nembuka SPM nyentuk ngagai pemegai degree.
Uggah nambah, kelimpah ari TPKM Rampangi, tiga iti TPKM ke bukai udah ditumbuh iya nya di Kabuloh, Miri, Semongok enggau Pijiru di Kuching.
Penyampau 92 iku orang nyereta program TPKM di serata Sarawak ke alai 53 peratus ngarika raban nembiak.
Ngenang kaul ke sama, iya madah menua kitai meratka raban orang nembiak ngaul diri ba pengawa betanam bet- upi ketegal penyampau sida diatu udah majak kurang.
“Diatu 14 peratus ari 12.5 juta raban nembiak di menua tu ngaul diri ba pengawa betanam betupi lalu penyampau sida tu balat ngirauka perintah.
“Pekara tu meri empas ke enda manah ba stok enggau pengelikun pemakai di menua kitai,’ku Uggah ke mega Menteri Betanam Bertupi Moden, Tanah Adat enggau Pemansang Kandang Menua.
Semilan puluh empat iku graduet nerima sijil Institut Pertanian Sarawak kemari pengudah mujur nembuka Program Sijil Pertanian sesi 2016/2018.
Kenyau ari taun 1985, Institut Pertanian Sarawak, Semongok udah mansutka 1,466 iku graduet.
Bela datai Pemangku Direktor Opis Betanam Betupi Sarawak Dr Alvin Chai enggau orang bukai.
Pengawa betanam betupi diatu majak ngerembai lalu ulih nempa orang dagang betanam ke ngembuan penatai pemisi tinggi. Datuk Amar Douglas Uggah Embas Sapit Kepala Menteri Sarawak