Meluan dijamin deka nerima perati perintah ba pekara pemansang
JULAU: Meluan deka nerima perati laban Perintah Nengeri meri pemerat ngagai pemansang menua pesisir.
Meri jamin lebuh iya bejadika Program Pemesai Begulai Enggau Rayat diatur Rumah Guma di Nanga Selabi, Merurun, Entabai semak ditu, kena Hari Minggu tu tadi, Kaban Kunsil Nengeri ( ADUN) Meluan, Rolland Duat madahka Kepala Menteri, Datuk Patinggi Abang Johari Tun Openg udah madah ngagai bala pengari rayat ari parti komponen Gabungan Parti Sarawak ( GPS) senentang langgur atur pengawa baru.
Perintah Nengeri deka ngagihka sebagi ari belanja besai dikena bejalaika projek penyikap perengka guna pemun enggau infrastruktur, tuju deka ngangkatka tikas idup peranak menua pesisir, ku iya, seraya nambah, ba pekara tu, Kepala Menteri udah ngaga pemutus nangguhka pejalai projek ti enda entu berat nyengkaum nangguhka projek LRP ti diperambu dikena ngemanahka sistem perengka pengangkut mensia mayuh.
Naka pekara diperati ba Meluan, iya ngarapka semua kandang menua deka disambung jalai belakin maya penggal keterubah iya nyadi pengari rayat, ku iya, seraya nambah, infrastruktur deka meri jalai ngagai pengawa nyambung bekal kuasa karan ari grid besai enggau bekal ai beresi ngagai semua rumah panjai ba sitak nya.
Taja iya mantaika pengandal diri serap Meluan deka disambung jalai belakin kandang beberapa taun ti deka datai, iya mega deka meri langgur penemu ngagai ejensi bejalaika pengawa ngambi ngemasukka sambung ngagai semua rumah panai, ku Rolland.
Enti langgur penemu iya enda diperunding, iya ulih ngena sebagi ari belanja Projek Transformasyen Menua Pesisir (RTP) nyedia abis nadai sambung jalai batu, ku iya nambah.
Nitih ku Rolland, projek besai ti ditetap dipejalai enda lama agi ba Meluan, iya nya renggat keterubah ari jalai Entabai/Rantau Limau, urung tujuh kilometer penyauh beungkus RM42 juta, enggau siti agi jalai ti nyauka sebaka penyauh enggau belanja ba renggat kedua.
Dikena ngemanahka sistem bekal ai ungkup serap menua Julau, agih belanja RM79 juta udah dikemendar, ku iya madah nyemetak.
“Ngelama dua taun aku nyadi pengari rayat ba Meluan, kitai udah nerima agih belanja lebih ari RM100 juta dikena bejalaika mayuh bengkah projek pulaika penguntung peranak ditu. Aku andal amat agih belanja deka mayuh agi ba taun ti deka datai laban perintah nengeri udah bisi jaku deka meri pemerat ba pemansang menua pesisir,” ku Rolland nandu.
Iya minta peranak Meluan terus meri sukung sida di belakang Perintah Nengeri GPS nentuka pengelantang enggau peminta sida dijaga memanah.
Baka selama, Rolland ngingatka peranak ngambi ngaul diri ba pengawa betanam betupi moden lalu nyikap diri ngena penerang enggau penemu teknologi pemadah nyadika jalai nambahka penatai pemisi sida ba jeman ekonomi digital.
Berebak enggau program nya, Rolland diberi basa bejadika sistem bekal ai baruh tanah ba rumah panjai nya.
Rolland mega bisi nyuaka belanja Projek Mit Pemansang Menua Pesisir (MRP) penyampau RM5,000 ngagai Komiti Pemansang Enggau Pengelikun Genturung Pendiau (JKKK) rumah panjai nya sereta besemaya deka mantu Biro Indu rumah panjai nya nirika kedai enggau palan aktiviti pengudah sida ngaga pemutus ba projek diperambu.
Ba lansa bukai, rambau ngetu ba Rumah Ricy Chang Seli, Rolland bisi ngemendarka pemeri RM15,000 ngagai Biro Indu rumah panjai nya dikena ngaga kedai sida.
Antara bala bisi datai bini Rolland, bala ketuain komuniti sereta bala kaunsilor.